Hadia Atendementu Pasiente, AMTL Realiza Workshop

MEDIAONETIMOR-Atu hadia atendementu ba pasiente sira maka Associacão dos Medicos Timor-Leste (AMTL) realiza workshop konsultasaun final ba Kodiku Etika no padraun kompetensia mediku. Iha tempu hanesan fó mós toma de posse ba membru foun sira.

“Ne’e inisiativa importante. Ohin AMTL halo enkontru ne’ebé relevante ba atendementu ema moras nian hodi koalia konaba kode Etika no standar profesional. Loron dahuluk koalia liu konaba kode Etika. Loron tuir mai sei koalia konaba standar professional.”

Hateten Diretora Geral AMTL, Odete Maria Viegas ba Media One Timor bainhira remata abertura wokshop ne’ebé sei hala’o durante loron rua, iha Centru Convensaun Dili (CCD), Segunda, (06/03/2017).

Nia hateten, keisas hosi komunidade no pasiente ba atendementu ladun diak sei tahu konsiderasaun. Maibé, husu ba komunidade sira atu hatur evidensia ba médiku no professional saude sira nia kna’ar ne’ebé lalos.

Tanba hatutan Odete, dala barak komunidade rona lia anin deit. Buat barak maka la hanesan ho realidade. Prosesu hotu-hotu, liu-liu ba ema nia vida moras sei hala’o liu hosi asaun ida ne’ebé iha koñesimentu klean.

Maske nune’e, Presidente AMTL ne’e promote atu servisu hamutuk ho Associacão dos enfermeiros, Parteiras, Medicos dentista sira no Saude Públika ne’ebé hamahan a’an iha Ministeriu Saude para hadia atendementu ne’e.

Katak Odete, durante workshop medicos espesialista sira sei aprezenta konaba standar professional nian iha ida-idak nia area. Oinsa Medicos espesialista sira nia lalaok no oinsa Medicos Geral sira lao.

Konaba membru medicos foun nian katak Odete, sira gradua tiha ona. Maibé seidauk tama iha membru AMTL. Hamutuk kuaze nain 200 maka foin tama. Nune’e, total Medicos iha Timor-Leste (TL) tantu espesialista, Medico Geral no Medico Dentaria hamutuk nain 1.000.

“Aliende sira hanesan membru AMTL, sira mós tama hanesan funsionario públiku. Tamba ne’e, se iha tezas ruma hosi membru Ministeriu Saude liu hosi Inspector Saude sei halo investigasaun. Nune’e ba sira ne’ebe halo mal parktika no servisu lalos, tenke ba prosesu,” dehan Odete.

Iha futuru tuir Odete, espera katak la hare deit ba kuantidade. Maibe kualidade maka persiza hadia. Nune’e husu ba membru hotu-hotu, Medicos Espesialista, Medicos Senior no Dedicos Foun sira atu servisu hamutuk para halo mudansa ba Nasaun Timor-Leste.(Reportajem Jornálista Estájiariu Deonisio da Cruz)

Leave a Reply

Your email address will not be published. Required fields are marked *