Lakon Dala Rua, Xanana Apoiu Maka Lu-Olo Prezidente

MEDIAONETIMOR-Maske seidauk iha anunsiu ofisial ba rezultadu eleisoens Prezidensial periodu 2017 to’o 2022, maibe Partidu Politiku (Parpol) Fretilin hato’o ona sira nia deklarasaun politikus manan eleisoens.

“Ho apoiu hosi hau ni-nia Maun Xanana ho ninia partidu rasik maka Kandidatura Fretilin, atual Prezidente Parpol Fretilin ikus mai hakat duni ba palasiu Prezidente Repúblika.”

Lia fuan hirak ne’e hato’o hosi Sekretariu Jeral (Sekjen) Parpol Fretilin, Mari’i Alkatiri iha deklarasaun politikus manan eleisoens prezidensial tinan 2017 iha konferensia imprensa, Tersa, (21/03/2017) iha CCF Fretilin.

Nia hateten, hafoin tinan naruk luta para hetan fali kadeira Prezidensial ne’e maka bele fo ona garantia ba povu tomak katak liu tiha loron 20 fulan Marsu tinan ne’e to’o tinan 2022 Fretilin sei ukun hodi hakuak povu tomak.

Mari’i Alkatiri esplika liutan, Fretilin iha lejitimadade atu ukun rai ida ne’e. Fretilin hatene ukun. Durante funu Fretilin hakuak povu maubere tomak to’o hetan rezultadu uku a’an.

Atu hetan diak katak Mari’i Alkatiri, laiha ema ida diak liu atu halo penitensia ba susesiu. Atu hakuak povu tomak. Atu lori povu ne’e kore a’an hosi mukit. Hosi kiak no atu hasai povu hosi nakukun. Maibe so hosi Fretilin deit maka bele.

“Laiha ema ida tan diak liu fali Lu-Olo. Tamba ne’e ita hotu tenki mai haksolok. Ita hotu tenki kontenti,” dehan Mari’i Alkatiri hodi lori Xanana nia naran hateten, vitoria ne’e marka tempu foun ba Timor-Leste.

Hateten Mari’i Alkatiri, hosi vitoria ne’e tempu ida fdiak atu ita loke dalan ida ke furak tebes no luan tebes. Dalan ida ke ema hotu-hotu bele lao. Dalan ida ne’ebe povu tomak bele lao hamutuk ho nia lideransa.

“Ba kandidatura nain 7 sira seluk, hau hakarak fo korajem para atu simu festa demokrasia ida ne’e. Foti exemplu Lu-Olo ne’ebe kandidata a’an to’o dala tolu maka foin manan. Nune’e tinan 5 mai tan bele kompete fila-fali,” sujere Mari’i Alkatiri.(reportajem Jose Samuel/Joao da Costa)

Leave a Reply

Your email address will not be published. Required fields are marked *