Hetan Bandu Foka MF, Jornálista Hato’o Solidaridade Suzana:“Tanba Dezemvolve Fraku, Governu Tauk”

MEDIAONETIMOR-Dala idatan iha nasaun demokrátika hanesan Timor-Leste (TL), jornálista hetantan violensia. Iha tinan 2017, violensia ne’e mai hosi Security Guardamor tanba hetan autorizasaun Ministeriu Finansa (MF) para bandu jornálista.

Tuir kronolojia hosi Vitima, reporter Televizaun Timor-Leste (TVTL), Aderito Manos iha konferensia imprensa iha Salaun edifisiu Fundasaun Fundu Media (FFM), Sesta, (07/04/2017) hateten, akontesementu ne’e akontese hahu iha Quarta, (04/04/2017).

Maizu menus iha tuku 10:00 OTL Jornalista TVTL; Reporter Aderito Manos ho cameraman, Nuno Freitas hakat ba edifisiu MF iha Farol, Dili. To’o iha odamatan portaun, sira nain rua hetan lisensa hodi hakat liu ba to’o jardim.

Maibé to’o iha odamatan tama edifisiu laran, security guardamor nain rua seluk lahatan sira tama ba edifisiu nia laran hodi foka imajem. Prosesu negosiasaun kumesa hahu. To’o funu lia fuan mosu. Seguransa Guardamor no jornalista deskute malu naruk.

“Imi labele mai hasai imajem. Jornalista sira labele mai. Ne’e desizaun hosi MF, inklui imi TVTL mós labele. Ami halo tuir deit saida maka ulun bo’ot sira haruka,” hasara Aderito Manos hodi hatutan nia amiasa atu baku rahun kamera filmajem. No duni tenki sai hosi ne’eba.

Funu lia fuan to’o amiasa malu ne’e, ikus mai jornalista nain rua fila ho liman tanan. To’o iha redasaun notisia hatun hodi reasaun makas hosi Asosiasaun Jornalista Timor-Leste (AJTL) no Timor-Leste Press Union (TLPU).

“Ami jornalista sira iha AJTL no TLPU mai hamutuk iha salaun FFM ne’e hodi fó solidaridade ba akontesementu violensia hasoru jornalista iha TVTL. Dala idatan jornalista hetan violensia hosi security,” katak Zevonia.

Nia hatutan, jornalista sai ona vitima dala barak iha tempu hirak nia laran bainhira hala’o kna’ar kobertura para atu públika informasaun ba públiku hanesan iha artigu 41 garantia Liberdade imprensa no liberdade espresaun. Katak, jornalista iha direitu no dever hodi assesu ba fatin hotu-hotu hodi halo kobertura. Liu-liu informasaun ne’ebé iha relasaun ho Estadu no Publiku.

Hatutan Zevonia, hosi akontesementu ne’e hatudu katak impede ona jornalista nia servisu hodi halo kobertura ba interese nasional. Informasaun husi pessoal guardamor hateten katak MF la autorija jornalista sira hodi foti imagen ka halo kobertura.

“Perguntas bo’ot ba ami jornalista no assosiasaun sira tamba saida maka MF la fo’o autorizasaun ba jornalista sira hodi foti imagen no halo kobertura iha Edifisiu ne’ebe Refere ho nune’e “ Ami husi AJTL no TMPU Ejiji;

  1. Husu ba governu atu komprende servisu Jornalista nian katak tenke fo’o espasu bo’ot ka Liberdade ba jornalista sira hodi assesu informasaun ne’ebe ligadu ho interese Nasional
  1. Husu ba Konsellu imprensa no Secoms atu kontinua halo sosializasaun konaba Lei komunikasaun social no kodigu etika jornalistika hodi públiku hatene katak jornalista sira iha Liberdade hodi assesu informasaun no halo kobertura iha Fatin hotu.
  1. Husu ba Konsellu Imprensa atu fahe informasaun ba orgaun hotu-hotu. Organizasaun privadu ka publik atu respeita jornalista nia servisu. No la halo Violensia hasoru jornalista. Tamba Jornalista laos kriminoju. Eleisaun jeral besik ona no jornalista hotu iha prekupasaun bo’ot karik sei bele akontese tan hahalok krimihasoru jornalista iha fatin ne’ebe deit.                                                                                                                                                                                                                                                                             Dezemvolvimentu Fraku

Iha parte seluk tuir Diretora Media ONE Timor no Diretora FFM, Suzana Cardoso hateten, dezemvolvimentu iha Timor-Leste lao sabraut hodi hafraku povu TL nia moris diak. Nune’e maka halo ukun nain tauk atu povu hatene.

“Media ne’e reprezenta povu hodi sisi sira nia osan ne’ebe ukun nain sira gasta ba dezemvolvimentu. Inklui edifisu MF. Nune’e media sira iha obrigasaun atu husu tuir nia progresu to’o iha ne’ebe ona,” hateten Suzana hodi hatutan.

Desde hahu dezemvolvimentu to’o ohin loron, Timor-Leste taka a’an los. Laiha transparansia ba publiku. Jornalista atu konfirma informasaun ruma tenki ba to’o ministru ka primeiru ministru. Diretor satan media ofisiais sira hetan bandu taka ibun ba jornalista.

Katak Suzana Ministru sira koalia ho lia fuan diplomasia hodi taka a’an ba dadus sira ne’ebe konkretu. Tanba dadus ne’e hatudu faktus ba lia los. Jornalista maka sei sai vitima ba tauk hosi governu. Hanesan akontese ba jornalista TVTL ne’e.(José Samuel)

Leave a Reply

Your email address will not be published. Required fields are marked *