Vice MOPTK: “Engenaria Save Dezemvolvimentu”

MEDIAONETIMOR-Nu’udar nasaun bebé iha tempu globalizasaun, Timor-oan dau-daun ne’e hasoru dezafiu bót iha area ejeneria ne’ebe sai hanesan save ba dezemvolvimentu hodi muda povu nia moris diak.

“Tanba area engenaria save ba desenvolvimentu maka politika Timor-Leste (TL) deside hodi prepara rekursu humanus ba profesores sira. Katak, profesores sira tenki iha duni vokasaun ba hanorin iha area engenaria. No eskola hanesan politekniku tenki kompleta ho laboratorium.”

Lia fuan hirak ne’e hato’o hosi Vice Ministro das Obras Púlikas Transportes e Komunikasoens (MOPTK), Inacio Freitas Morreira iha Seminariu sentifiku, iha salaun Universidade Oriental Timor-Lorosa’e (Unital) iha hahu fulan Abril Tinan 2017.

Moris hanesan bebé oan iha tempu globalizasaun katak Inacio, hanesan dezafiu ba Timor-oan. Nune’e, hakarak vokasaun iha area engenaria tenki esforsu hodi estuda. Liu-liu tamba ekipamentus iha eskola tékniku sira seidauk kompletu.

Nune’e, maske ekipamentus laboratorium engenaria karun, maibe Vice Ministru MOPTK ne’e husu ba fundadores universidade hotu-hotu atu halo jestaun ho diak hodi kompleta laboratorium para Timor-oan akaba hosi universidade ne’e hatene ona halo servisu. Fundadores universidade tenki esforsu. Labele harí tiha depois abandona fali eskola.

Hatan prekupasaun hosi Vice Ministru MOPTK, Reitor Unital, Roberto Geronimo rekunyese universidade tékniku iha TL maoria sei falta ekipamentus. Hosi Unital sei resolve ho kada tinan-tinan aumenta nei-neik tuir kapasidade.

“Atu universidade sira iha obrigasaun kompleta prosesu aprendizazem ho fasilidade laboratorium maka Ministeriu Edukasaun tenki kria lei harí universidade nian. Semaka harí universidade tékniku tenki kompleta laboratorium nian. Maibe agora laiha, ema ida-idak bele harí tuir nia gostu,” katak Roberto.

Iha parte seluk Prezidente Komisaun Organizadora Seminariu sentifiku ba Fakuldade Engenaria tékniku iha Unital, João Batista Soares promote, nu’udar engenaria estudante Unital prontu atu kria kampu servisu.

Tanba hatutan João, estudante Unital iha area engenaria aprende informatika, elektronika, konstrusaun sivil no mekanika hodi garantia sira nia kapasidade liu husi prosesu aprendiazazem partisipasaun aktividade praktika nian.

“Maske fasilidade ne’ebé maka limitadu, seidauk sufiente ba ami estudante sira hodi kompletu prosesu aprendezazem, maibe fiar katak iha futuru leitorial lideransa universidade sira bele kria fasilidade engenaria nian ba estudante hodi aprende ho diak liu tan,” sujere João.(Estájiariu Jhydo/Matias)

Leave a Reply

Your email address will not be published. Required fields are marked *