Hasoru Kampaña Parlamentar 2017, PR Lu-Olo: ” Labele Sukit Malu Iha Rede Sosial Ho Naran Falsu”

MEDIAONETIMOR-Hasoru kampaña Eleisaun Parlamentar tinan 2017 ne’ebé sei hahú iha loron 23 Fulan Juñu 2017 ne’e Prezidente Repúblika (PR), Francisco Guterres Lu-Olo husu ba sidadaun Timor-oan sira atu labele sukit malu iha rede sosial hó naran falsu.

“Molok partidu politiku sira hahu sukat no sadik malu iha sira nia kampaña atu manan povu nia votus iha loron 22 Jullu 2017, hau aproveita oportunidade deskursu iha konsertu da paz ne’e hodi husu povu TL atu hili partidu tuir ida-idak nia hakarak. Tuir idak-idak nia fiar.”

Hateten PR Lu-Olo iha nia deskursu iha konsertu muzika da paz iha Episkopál Lecidere, Dili, Sabadu kalan, (17/06/2017) ne’ebé lé husi Casa Sivil Prezidente Repúblika nian.

Hateten PR Lu-Olo hodi husu Timor-oan sira atu labele sukit malu iha rede sosial ho naran falsu hodi dehan, “Sese deit maka insulta no defama ema ruma, maibe la fó sai nia naran rasik lahatudu responsabilidade nu’udar sidadaun rai ida ne’e nian.”

Aliende ne’e PR Lu-Olo mós husu ba Timor-oan sira atu vota ho kualidade. Vota ho konsensia. Hili partidu ida ne’ebé iha programa diak. Ida ne’ebe sei haburas rai ida doben ida ne’e ba beik-beik.

Hatutan PR Lu-Olo, Timor-oan sira tenki hili partidu ida ne’ebé sei halo progresu ba povu bele moris diak liutan aban bain-rua. Futuru rai ida ne’e, Timor-Leste nian harí ohin loron iha momentu ida ne’ebe lao ba daudaun futuru ba ita nia alin, oan no be’e oan sira.

PR Lu-Olo mós husu atu nafatin hametin espritu dame no hametin estabilidade rai ida ne’e nian iha rohan laek. Ita hotu sei lori ba espritu dame hodi jornada da paz ida ne’e nu’udar rikel ida hodi fo fiar ba partidu oin seluk ida.

“Hamutuk ita sei tane nafatin valor no prinsipiu Kristão sira ne’ebe identifika mós ita nu’udar sidadun Timor-oan. Hau Presidente Repúblika laran metin katak Igreja katolik sei fahe nafatin valor no prinsipiu sira ne’e,” hateten PR Lu-Olo hó eperansa bo’ot.

Husi partidu politika 21 ne’ebé sei compete ba povu nia votus ne’e sira ne’ebé partisipa iha konsertu da muzika ne’e partidu politika, Khunto, PUDD, CNRT, Fretilin, Frente-Mudansa, BUP, CASDT, PD no PLP.

Iha momentu ne’e partidu politika sira mós hato’o sira nia kompromisiu para atu kria paz no dame iha Nasaun Timor-Leste ne’e.(Reportájem Suzana Cardoso)

 

Leave a Reply

Your email address will not be published. Required fields are marked *