TVE Selebra Aniversariu Daruak

MEDIAONETIMOR-Maske tama ona ba idade rua ona maibé hó prezensa televizaun (TV) foun barak iha Timor-Leste (TL) halo estudante sira ne’ebé aprende tiha ona halai hotu ba servisu iha ne’eba hodi halo Televizaun Edukasaun Timor (TVE) hasoru krizi rekursu humanus.

“Dau-daun ne’e TVE menus tebes rekursus humanus. Tanba estudante sira ne’ebé tinan barak aprende desde sira sei eskola, ikus mai TV sira hanesan; RTTL, Global TV, RTL, Guarda-Mor TV no TV sira seluktan rekruta tiha.”

Lia fuan hirak ne’e hato’o husi nain ba TVE, Armindo Crisna Caetano iha nia diskursu iha aniversariu TVE ba dala rua ne’ebé monu iha loron, Segunda, (26/06/ 2017) ho tema sai inspirasaun ba dezemvolvimentu, iha Eskola Colégio São Miguel (CSM), Dili.

Esplika Armindo, desde hari’i iha tinan 2016 to’o aniversariu ba dala rua ne’e TVE mós hasoru problema ekipamentus ne’ebé menus hodi difikulta programa barak maka lakonsege realiza. Laos deit ekipamentus, finanseiru para mobiliza no fasilita aktividade loron-loron mós sei menus.

Maske nune’e hateten Armindo, durante tinan 2 TVE halo ona programa balun hodi suporta foin sa’e promove sira nia a’an hó hetan doadores hosi Loja Sahabat no Dellos. “Ba futuru nafatin hein suporta para dezemvolve diak liutan TVE,” husu Armindo.

Iha parte seluk Secretario Estado Joventude no Desportu (SEJD), Leovegildo hateten, mídia hola pilar importante hodi sai hanesan; instrumentu atu forma no eduka lider no povu para sai sidadaun ne’ebé maka responsavel, siviku no sidadaun ne’ebe kumpri nia obrigasaun nomós dever iha direitu tomak.

Mídia mós katak Leovigildo, sai nu’udar alternativa ida hodi promove TL nia potensia no nia riku soin. Nomos mídia tenke sai hanesan fontes kontrol sosial. Maibé, mídia tenke koalia buat ne’ebe lós. Tenke aprezenta faktus no tenke luta duni ba buat ida ne’ebe mak interese ba nasaun nian. Mídia nia prezensa tenki fó solusaun ba prinsipiu.

Lahanesan hó Eis Primera Dama, Isabel Ferreira. Nia hateten, Colegio São Miguel (CSM) nu’udar eskola vokasional. Nune’e, estudante sira tenki dezemvolve a’an. Eskola CSM forma ema laos deit atu hetan diploma.

“Diploma barak ona iha TL. Maibé atu buka solusaun ba problema ne’ebé iha ita nia moris sei defisil. Iha ita nia nasaun ita seidauk hetan ema ne’ebe diak ho Diploma sira ne’e. Eskola vokasional dalan atu resolve problema ne’ebé imfrenta iha familia, sosiadade no nasaun,” tenik Isabel.(Estájiariu Joaninha/Leonia)

 

Leave a Reply

Your email address will not be published. Required fields are marked *