Komemora Tinan 20, Fokupers Halo Doasaun Ra’an

MEDIAONETIMOR– Komemora tinan 20 prezensa Organizasaun Não Governu (ONG) Fokupers ne’ebé monu iha loron 15 Júllu tinan ne’e halo aktividade doasaun ra’an iha Timor Plaza.

Maske hanesan parte ida hodi komemora tinan Fokupers nian, maibé Primeira Dama, Cidalia Nobre Guterres hatete, aktividade doasaun ra’an ne’e hanesan parte ida hodi tulun maluk sira seluk ne’ebé presiza duni ra’an ne’e.

“Aktividade doasaun ra’an ne’e nu’udar karidade ida para ita lolo liman hodi tulun malu. Ba feto maluk sira no labarik sira ne’ebé dala barak sai vitima iha kualker situasaun,” tenik Primeira Dama Cidalia.

Iha parte seluk, Diretora Executiva Fokupers, Marilia da Silva Alves iha nia diskursu antes hala’o aktividade doasaun ra’an konta konaba prosesu Fokupers harí iha tempu okupasaun Indonezia to’o ukun a’an.

Hateten Marilia, desde tinan 1997 Fokupers sempre hola parte iha prosesu tomak mai to’o tinan 2017 ne’e. Iha tempu luta ba ukun rasik a’an no to’o tempu dezemvolvimentu, Fokupers sempre hola parte hodi kontribui ba alkansa povu nia moris diak.

Relasiona hó aktividade doasaun ra’an katak Marilia, nu’udar aktividade sosial hodi tulun ema seluk. Hó ra’an turuk ida bele salva ema seluk nia vida. Katak, tenki fó solidaridade maluk sira ne’ebe presiza.

“Wainhira fó ita nia ra’an ida ne’e mós halo diak ba ita nia saúde. Tanba, hasai ra’an ne’e bele halo sirkulasaun ra’an diak liu tan. Nune’e keta tauk atu halo doasaun ra’an,” dehan Mirilia hodi enkoraza doasaun ra’an sira seluk.(Reportájem estájiada Dulce Ximens)

Leave a Reply

Your email address will not be published. Required fields are marked *