Se Lós Mak Sei Benefísiu Husi Governasaun Entre FRETILIN, CNRT no PLP?

—–Husi Goveia do Rosariu – Soares no hetan edita husi Media ONE Timor———

Molok Eleisaun Parlamentar 2017 ne’ebé sei akontese iha loron 22 Júliu 2017 ita akompaña diskusaun no debates barak entre partidu sira iha media oioin. Polémika entre partidu sira la’o namanas no entre lider sira mós mosu disharmonia relasaun liu-liu entre lideransa rezisténsia sira hanesan Mari Alkatiri husi partidu FRETILIN, Xanana Gusmão husi CNRT no Taur Matan Ruak husi PLP.

Husi partidu no koligasaun partidu 21 ne’ebé sei konkorre iha eleisaun parlamentár tinan ida ne’e, ita bele dehan iha partidu tolu, CNRT, FRETILIN, PLP maka iha oportunidade no suporta bo’ot liu atu kaer Governu husi tinan 2017-2022. Husi partidu tolu ne’e, personalidade husi Xanana Gusmao, Mari Alkatiri no Taur Matan Ruak sei influensia maka’as modelu governasaun no se maka hetan benefísiu barak liu husi sira nia governasaun.

Iha pergunta ida, se karik partidu ida husi partidu tolu ne’e mak kaer ukun, modelu governasaun saida no se deit mak hetan benefísiu husi governasaun oin-oin mai?

Senáriu 1 – CNRT nia modelu governasaun

Tinan 15 ona ita asisti modelu governasaun sira durante ne’e. Husi 2007-2012 ho Governasaun AMP no husi 2012-2017 ho Governasaun Bloku Koligasaun Parlamentár ne’ebé remata iha tinan 2015 bainhira Eis Primeiru Ministru (PM), Kay Rala Xanana Gusmão rezigna a’an no fo fali kargu ba DR. Rui Maria de Aroújo husi Fretilin. Iha buat balun maka ita bele analiza durante periodu ne’e maka hanesan tuir mai:

Primeiru, total orsamentu ne’ebé governu CNRT gasta ona husi tinan 2008 – 2016 hamutuk $9,371.8 millaun. Husi total gastu ida ne’e durante tinan 10, iha progresu balu ne’ebe atinji ona. Maibé iha buat barak mós seidauk atinji. Durante governasaun CNRT foku ba mega projetu hanesan Tasi Mane no ZEESM iha Oe-Cussi.

Barak kestiona tanba mega projetu rua ne’e nia gastu bo’ot maibé ninia benefísiu imediatu ba populasaun kbiit laek sira ladún klaru. Barak mós reklama katak kbiit laek sira sai vítima tan ba mega projetu sira ne’e. Ho lian seluk, mega projetu rua ne’e fo benefísiu barak liu ba kompañia bo’ot sira husi rai li’ur. Tanba mega projetu rua ne’e gasta osan barak.

Ho sasán sira hanesan temi iha leten, ita bele konklui katak atu kaer ukun tenki kuidadu atu benefísiu husi osan mina-rai ou osan povu Timor-Leste nian labele sulin ba bolsu kompañia sira. No povu kbiit laek sira sei marginaladu nafatin. Kompañia sira riku ba bebeik.

Ukun a’an tinan 15 ona, area sira ne’ebé bele fó benefísiu ba povu tomak (públiku) hanesan setór agrikultura, saúde, edukasaun no bé mós redús ba bei-beik kompara ho setór sira ne’ebé fó benefísiu ba kompañia bo’ot sira aumenta tinan ba tinan.

Iha sorin seluk, osan ne’ebé gasta la fó benefisiu diak maka hanesan; Gasta osan $52 millaun hodi halo edifísiu Ministériu Finansa. Rezidénsia Ministru(a) Finansa nian iha Igreja Motael nia sorin ne’ebé gasta $5 millaun no abandona to’o agora. Aat liu tan, Ministra Finansas, Emilia Pires ne’ebé kondenadu ho krime korrupsaun halai ba li’ur. Presiza sai lalenok ba ukun a’an tuir mai.

Husi parte politika nian maka iha eleisaun 2012, halo koaligasaun hodi kaer governu, maibé to’o dalan klaran harahun tiha hodi entrega podér ukun ba FREILIN. Husi ne’e maka halakon opozisaun iha parlamentu no ha-fraku demokrasia iha rai laran.

Ne’e maka ukun ne’ebé durante ne’e lao. Hó fiar a’an iha futuru fiar sei fó benefisiu ba Timor-aon hodi kore a’an husi kiak no mukit desizaun iha Timor-oan idak-idak nia liman iha eleisaun 22 Júllu 2017 ne’e.

Senáriu 2 – FRETILIN nia modelu governasaun

Atu analiza modelu governasaun FRETILIN lidera husi Mari Alkatiri iha buat rua maka bele sai sasukat. Primeiru maka FRETILIN nia ukun iha Primeiru Governasaun husi 2002-2007 no segunda bele mos sukat ho Mari Alkatiri nia jestaun ba ZEESM.

Iha primeiru Governu Konstitusionál, Mari Alkatiri ukun problema barak maka mosu.  Komesa husi demonstrasaun iha dia 2 de Dezembru ne’ebé rezulta demonstran sira sunu ninia família sira nia uma. Segundu mosu konflitu ho L7 iha 2004, tuir mai konflitu ho Igreja ne’ebé hamosu demonstrasaun loron 19 iha 2005 no ikus liu mak Krisi 2006 to’o Governu Fretilin monu.

Segundu, se ita hare modelu projetu ZEEMS nu’udar governasaun ida, ita bele uza mós hanesan sasukat hodi haré se modelu governasaun Fretilin nian se tinan lima mai sira mak kaer Governu. Mezmu ke projetu sira ne’ebé ZEEMS halo iha Oecusse barak mak gaba kona ba ninia kualidade, maibé ida ne’e hanesan modelu dezenvolvimentu forsadu ida ba populasaun lokál.

Evidénsia hatudu momoos iha eleisaun Prezidensiál iha fulan Marsu 2017 ne’ebé kandidatu Fretilin nian lakon iha Oecussi. Votus husi populasaun husi Oecussi hodi halakon kandidatu Presidente Fretilin iha Oecussi hanesan protesta ida no sinál disatisfasaun husi populasaun kontra modelu jestaun Mari Alkatiri nia iha projetu ZEESM.

Ho rasaun hirak iha leten, Timor-oan maka determina iha eleisaun parlamentar 22 Júllu 2017 agora. Hili tuir konsiensia no fiar metin katak sei lori Timor-oan ba moris diak.

Senáriu 3 – PLP nia modelu Governasaun

Se PLP mak lidera governu iha tinan lima tuir mai, iha buat ida mak ita uza hodi analiza modelu Governasaun PLP nian liu husi dalan hare lala’ok Taur Matan Ruak (TMR) nian nu’udar Chefi Estadu iha tinan lima, 2012-2017. Iha buat estraordináriu balun ne’ebé ita nota husi lideransa TMR nian.

Primeiru, antes kaer pasta nu’udar Chefi Estadu, TMR deklara uluk ninia riku-soin ba iha Tribunal Rekursu hodi fó sinál katak nia sei la na’ok povu nia osan no la trai povu nia fiar. Deklarasaun riku-soin ne’e nia halo tinan-tinan to’o nia mandatu remata.

Segundu, durante nia mandatu, nia redús viajen internasionál atu poupa osan. TMR nia viajen ba rai-li’ur ita bele sura ho liman.

Terseiru, TMR iha ninia mandatu tomak nu’udar Presidente da Repúblika, nia fó atensaun liu ba Timoroan sira liu husi vizita suku tomak hamutuk 442. Objetivu husi vizita suku ne’e aliende hakbesik estadu ba populasaun, rona populasaun nia preokupasaun no hare rasik populasaun sira nia problema nó mós dada media nasionál atu publika kona ba problema sira ne’ebé populasaun sira enfrenta.

Ho servisu sira hanesan temi iha leten, maka povu iha direitu tomak atu determina sira nia votus iha eleisaun parlamentar iha loron 22 Júllu 2017 ne’e. Hili sé maka tuir imi nia matenek merese atu ukun.

Konkluzaun

Ho rasaun sira iha leten, iha eleisaun parlamentár tinan ida ne’e eleitór sira tenke matenek no hili partidu ho figura ida ne’ebé bele reprezenta intese komún povu tomak nian hodi nune’e manan povu Timor-Leste maka manan. Lakon mai lolo liman ba malu hodi kontribui nafatin ba dezemvolvimentu. Tanba, tinan 5 mai sei sai determinasaun para fó tan konfiansa. Boa suseisu!!!(Edita ona husi Media ONE Timor)

 

Leave a Reply

Your email address will not be published. Required fields are marked *