Ramos Horta: “Se Laiha progresaun Fretilin-CNRT Moris La Hakmatek”

MEDIAONETIMOR-Hó konsiensia, reprezentante rezistensia no jerasaun 1975 nian, Marí Bin Amude Alkatiri atual Sekretariu Jeral Partidu Fretilin no Kay Rala Xanana Gusmão atual Prezidente Partidu CNRT, durante tinan 3 to’o ohin loron servisu diak teb-tebes.

“Sira nain rua iha todan bo’ot ida iha sira nia kabas. Ho sira nia konsiensia hatudu ona tinan 3 mai to’o ohin loron servisu diak tebes-tebes. TL hetan dame no dezemvolvimentu tanba lider nain 2 ne’e nia kolaborasaun. Se laiha progresaun Fretilin ho Partidu CNRT ita la moris hakmatek.”

Lia hirak ne’e Eis Prezidente Repúblika, José Ramos Horta hatu’un ba jornalista hafoin remata hasoru malu hó atual Prezidente Repúblika, Francisco Guterres Lu-Olo iha Palacio Prezidensial Aitarak laran, Sesta, (28/07).

Ramos Horta hateten, progresaun Partidu Fretilin hó Partidu CNRT nian liu hosi Marí no Xanana tenki kontinua to’o tinan lima oin mai hodi dezemvolve Nasaun TL. Ne’e duni Marí hó Xanana iha prosperidade bo’ot.

Suzere Ramos Horta, Marí hó Xanana tenki tu’ur hamutuk para haré solusaun diak liu. Xanana tinan 10 nia laran halo buat barak ona. Infrastruturas oi-oin. Timoroan lubuk ida haruka ba estuda iha rai liur tenki kontinua para halo parte prosesu prepara jerasaun foun tinan 2022.

Premiadu Nobel da Paz ne’e haklean, Maun Bo’ot Marí ho Maun Bo’ot Xanana, sira nain 2 reprezenta iha Partidu 5 ne’ebé manan. Sira 2 maka reprezenta jerasaun rezistensia no jerasaun 1975. Sira 2 tenki tu’ur hamutuk hodi kolabora. Haré governasaun saida mak diak liu iha tinan 2017 to’o 2022.

Katak Ramos Horta, Marí hó Xanana simu responsabilidade hodi hare governasaun ne’e para hametin no haklean dame. Hadia didiak Instituisaun Demokratiku, Instituisaun Estadu, Poder Judisial, hadia Funsionamentu Parlamentu. Hatu’un korupsaun no hatu’un gastu ka dispensa sira ne’ebé la presiza tenki taka. Ne’e bele realiza, tenki iha lider 2 ne’ebé forte hodi servisu hamutuk.

Ramos Horta saúda desijaun Partidu PD no KHUNTO ne’ebé hakarak involve iha formasaun VII Governu RDTL. Sira hakarak kolabora para 2017-2022 estabilidade ida diak liu para 2022 sira bele simu estadu ida iha prosperidade no estabilidade. No PLP hakarak sai oposizaun ida ne’ebé edukativu no forté. Desijaun partidu 3 ne’e hatudu sira nia matenek no korensia ba moris diak povu nian.

Hatan posizaun CNRT nian ne’ebé to’o agora seidauk klaru, hó diplomasia Ramos Horta hatan, se CNRT tama oposizaun sei forté liu tan. Governasaun laos deit governu. Parlamentu maka halo governasaun. Tanba buat hotu-hotu liu hosi; intermus orsamentu, programa no lei sira.

“Hau nia hanoin diak liu Fretilin hó CNRT mantein hodi servisu hamutuk nafatin. Maun    Xanana tenki iha papel ativu ida sentral iha governasaun para kontinua ezekusaun planu estratéjiku dezenvolvimentu 2011-2030. Ne’e maka motivasaun maun Bo’ot Xanana nian hakarak lori ne’e ba oin. Entaun labele hela deit opozisaun. Tenki poder ka ezekutivu hamutuk ho partidu vensedor,” tenik Ramos Horta.

Konaba naran Marí Alkatiri iha lista numeru dahuluk katak Ramos Horta, Marí maka sai Primieru Ministru iha partidu vensedor, nia ema kompetente teb-tebes. Ema hotu-hotu hatene uluk kedas Primeiru Ministru agora kaer ZEEMS Oe-Cusse diak tebes. Durante tinan 10 ne’e nia aprende liutan iha kualidade atu kaer governu.

“Parabéns ba partidu hotu-hotu ne’ebé manan. Sira ne’ebé la manan mós kontribui ba debate diak tebes-tebes. Agradese felisitasões ba CNE, STAE, F-FDTL, PNTL, observador nasional no internasional nomos media sira nia servisu maka’as iha eleisaun lejislativa 2017 to’o remata,” hameno Ramos Horta.(Reportájem Deonisio da Cruz)

 

Leave a Reply

Your email address will not be published. Required fields are marked *