Konstituisaun Autoriza Forma Governu Hó Deit Manan Maioria-AMP

MEDIAONETIMOR-Rezultadu votus eleisaun lejislativa tinan 2017 ne’ebé prejudika lider partidaria sira atu forma governu, tuir Konstituisaun Repúblika Demokrátika Timor-Leste (RDTL) nian autoriza deit atu forma Governu liu husi hó manan maioria ka Aliansa Maioritar Parlamentar (AMP).

Hanesan hakerek iha;

KAPÍTULU II

FORMASAUN NO RESPONSABILIDADE

Artigu 106.”

(Nomeasaun)

  1. Primeiru Ministru hili hosi partidu ida ne’ebé iha votu barakliu ka hosi aliansa partidu sira-ne’ebé iha nia ema barak iha Parlamentu no iha nomeasaun hosi Prezidente-Repúblika, wainhira rona tiha partidu politika sira ne’ebé iha reprezentante sira iha parlamentu Nasionál.
  2. Membru Governu siraseluk, Prezidente-Repúblika mak sei hili liu husi Xefé-Ministru nia proposta.

Maibe, tanba eleisaun lejislativa tinan 2017 laiha partidu ida hetan  votus barakliu ka manan maioria maka tenki liu husi Aliansa Partidu Maioritar iha Parlamentu Nasionál (AMP). Eleisaun lejislativa 2017, obriga tenki halo koaligasaun hodi forma governu.

Nune’e, ideia dehan katak atu forma governu liu hosi Unidade Nasional, Governu minotária inkluzaun no Governu minotária insidénsia Parlamentár, iha Konstituisional RDTL la fó autorizaun ba ida ne’e.

Hanesan públika tiha ona iha mídia nasional sira katak, hosi partidu 21 ne’ebé kompete iha eleisaun parlamentar Partidu Fretilin hetan 23, CNRT 22, PLP 8, PD 7 no Partidu Khunto nia kadeira 5 deit hodi kompleta kadeira 65 iha Parlamentu.

Atu kaer governu partidu ida tenki hetan kadeira barak liu 33 ba leten. Daun-daun ne’e hosi Partidu 5 ne’ebé maka hakat ba uma fukun, PLP deklara a’an ona atu sai oposizaun deit.

Khunto hein konvite hodi ba koalisi. Fretilin hakarak koalisi hó deit Kay Rala Xanana Gusmão. Maibé CNRT hó PD sei hein tribunal rekursu ne’ebé tuir planu ohin, Tersa, (01/07/2017) mak sei anunsiu rezultadu final eleisaun parlamentar tinan 2017 nian ne’e.

Antes ne’e Media One Timor nia analiza katak, wainhira Fretilin no CNRT lahalo kaolisi, Khunto Barometru ba koaligasaun. Hó desizaun PLP nian maka Partidu PD no Khunto dalan ikus koaligasaun nian, kuandu CNRT hó Fretilin lahalo koaligasaun.

Maibé, haré hosi ligasaun emosional, Partidu PD sei nafatin hakarak koalisi hó deit CNRT. Entertantu, Sekretariu Jeral Fretilin, Marí Bin Amude Alkatiri mós hakarak forma governu hó deit Kay Rala Xanana Gusmão. Mais nunka temi hakarak koalisi hó Partidu CNRT.

“Ba ami jerasaun foun iha Partidu PD nu’udar jerasaun ne’ebé hatutan funu nain sira nia mehi. To’o ne’ebé deit nafatin konsidera Maun Bo’ot Xanana nu’udar ami nia komandante. To’o minutu ida ne’e, ami nafatin sei hanesan soldadu prontu ba Maun Bo’ot Xanana,” hateten Prezidente Partidu PD, Mariano Sabino Asanami iha debate espesial Kampaña Elisaun Parlamentar 2017 iha Televizaun GMN ne’ebé lidera hosi Premiadu Nobel da Paz, José Ramos Horta.(Reportájem Suzana Cardoso)

Leave a Reply

Your email address will not be published. Required fields are marked *