Marí Buka Xanana Silensiu, PLP Nakloke A’an Ba Partidu 16

MEDIAONETIMOR-Hafoin Tribunal Rekursu ofisialmente legaliza rezultadu eleisaun Parlamentar tinan 2017 nian Sekretáriu Jeral Partidu Fretilin, Marí Bin Amude Alkatiri kumesa buka Partidu CNRT hodi halo koaligasaun. Maibé, Prezidente Partidu CNRT, Kay Rala Xanana Gusmão sei silensiu.

Hanesan públika tiha ona, Presidente Tribunal Rekursu, Deolindo dos Santos deklara, apuramentu nasional ba eleisaun iha loron 22 Jullu 2017 ho total totál eleitór inskritu ba eleisaun parlamentar hamutuk 760.907, eleitor votante 583.956, votu válidu expressos 568.070 (97,28%), votu branku 4.097 (0,70%) no votu nulu 11.711 (2,01%).

Resultado Final hatudu katak partidu 5 mak konsege passa bareira 4%. Fretelin 29.7% hó 23 kadeiras hosi votus validus 168,480, CNRT 29.5% hetan 22 kadeiras hosi votus validus 167,345, PLP 10. 6% soma hetan 8 kadeiras hosi votus validus 60,098, PD 9.8% iha 7 kadeiras ho votus validus 167,345 no KHUNTO 6.4% hó 5 kadeiras iha Parlmentu Nasional hosi votus validus 36,546.

Hanesan públika tiha ona katak Marí Alkatiri hakarak koalisi hó Partidu CNRT nu’udar komprimisiu ba votantes durante kampaña eleisaun nian, maibé to’o agora estrutura Partidu CNRT seidauk foti desijaun tanba Prezidente Partidu ne’e sei nonok hela. Hili dalan silensiu.

Maske nune’e, hafoin remata partisipa anunsiu final iha Tribunal Rekursu, Vice I Prezidente Partidu Demokratiku (PD), Samuel Mendonça ba jornalista hateten, rezultadu ne’e signifika PD nia votus aumenta sa’e. Maibé, tanba bareira sae ba 4% maka kadeira tu’un 7 deit.

“Eleisaun Parlamentar tinan 2007 to’o 2012, PD manan hó kadeira 8 hó votus maizu menus 4,800,000. Agora hatu’un fali kadera 1 ba 7 ho nia votus aumenta. Katak, PD hanesan partidu ne’ebe kompete diak iha elisaun 2017 nian prontu atu kontribui,” dehan Samuel.

Maske durante tinan 15 Partidu PD seidauk sai oposizaun, maibé Samuel hateten, hó esperensia durante tinan 10 iha governasaun maka PD prontu ona atu kontribui ba povu nia moris diak iha kualker desijaun.

Katak Samuel, hó kunfiansa votus povu nian ne’ebé fó fiar, PD prontu kontribui ba povu nia moris diak iha governu no prontu atu sai oposizaun. Depende desijaun lideres partidariu sira.

“To’o agora seidauk iha kontaktu ofisial. Maibé ita kria komunikasaun. Tamba, Nasaun Timor-Leste hotu-hotu nia responsabilidade. Laos Partidu Fretilin, CNRT, PLP ka PD deit. Importante kria komunikasaun entre lider sira para haré futuru nasaun nian lao ba oin,” tenik Samuel.

PLP Nakloke A’an

Iha parte seluk Sekretariadu Jeral Partidu Libertasaun Popular (PLP), Fidelis Mangalhães hateten, odamatan PLP nakloke ba partidu 16 sira seluk ne’ebé lakonsege hakat ba uma fukun PN.

“PLP prontu rona nafatin sira hotu nia opiniaun. Ba TL fatin sei iha nafatin ba timoroan hotu nia matenek atu kontribui. Tanba, PLP promete ona hakarak halo politika ne’ebé diak liu ba TL hodi timoroan moris diak,” tenik Fidelis.

Konaba prosesu formasaun VII governu, dehan Fidelis, prosesu formasaun governu lao tuir Konstituisaun RDTL nian iha artigu 106 ne’ebé mak defini tiha ona mekanismu oinsa mak governu foun sei harí.

Fidelis hatutan, Prezidente Repúblika maka sei inisiativa atu rona partidu sira ne’ebé mak iha asentu parlamentar. PLP tuir nafatin prosesu. Maibé hanesan deklara tiha ona katak PLP partidu ida ne’ebé mais vokasionadu ba opossisaun.(Reportajem José Samuel/Estajiada Nofiana da Costa)

Leave a Reply

Your email address will not be published. Required fields are marked *