Workshop Nasional Ba OSC, Osan U$52.000,00 Ba Aktividade 4

MEDIAONETIMOR-Atu halo monitorizasaun ba finansa públiku hodi melhora diak liutan dezenvolvimentu no ejekusaun orsamentu estadu maka Auditoria Sosial ba Organizasaun Sosiedade Civil (OSC) realiza workshop nasional.

“Ami tinan-tinan sempre halo asumisaun ba komisaun finansa públiku Parlamentu Nasional (PN). Asumisaun nia rejultadu monitoria sempre lori ba aprezenta iha ministeriu ne’ebé presiza para benefisia ba povu nia moris diak.”

Lia fuan hirak ne’e hato’o hosi, Diretor Executivu Fongtil, Arsenio Pereira da Silva ba jornalista hafoin remata loke Workshop Nasional Auditoria Sosial ba OSC iha Hotel Ramelau, Kinta, (03/08).

Partisipa Workshop ne’e organizasaun sosiadade sivil sira, Reprezentante United Nation Development Program (UNDP), Uniaun Europeia (UE) no membru Parlamentu Nasional balun.

Arsenio esplika liutan, hosi monitorizasaun nota katak tinan-tinan gastus orsamentu estadu nian barak liu maka infrastrutura baziku no eletrisidade, nu’udar periodade governu nian. Monitorizasaun ba orsamentu ne’e sei hala’o tinan-tinan para fó benefisiu ba povu kbi’it laek sira.

Iha fatin hanesan Membru Konsellu Fongtil, Albertino de Araújo Martinho Asa esplika kona ba Projeitu Pro Palop ne’ebé hetan suporta husi Kaboverde liu husi Komunidade Nasaun Lian Portugues (CPLP) hó Timor-Leste iha UE no UNDP hó osan hamutuk U$52.000,00.

Katak Albertino, osan ne’e Fongtil sei uza ba halo aktividade 4 iha tinan 2017 nia laran. Ida husi aktividade 4 ne’e maka Fongtil realiza workshop kona ba auditoria ba sosiadade sivil sira para hatene auditoria hodi halo monitorizasaun ba iha exekusaun orsamentu estadu nian.

“Sosiadade sivil tenki halo monitorizasaun ba iha exekusaun orsamentu estadu ne’ebé governu halo hodi ikus mai timoroan hetan boa governasaun iha Nasaun Timor-Leste,” tenik Albertino. (Reportájem José Samuel) 

Leave a Reply

Your email address will not be published. Required fields are marked *