La-Aseita Eleisaun Antisipada, PLP Mantein Sai Oposizaun

MEDIAONETIMOR-Hafoin trata malu entre Prezidente Partidu Libertasaun Popular (PLP), Taur Matan Ruak hó Sekretariu Jeral Partidu FRETILIN, Marí Bin Amude Alkatiri iha kampaña Eleisaun Parlamentar (Elpar) 2017 nian, Primeira Vez iha sira nia hasoru malu akontese atmosfir amizade no domin ba-malu ne’ebé forte entre lideransa partidaria nain rua ne’e.

Atmosfir amizade ne’e hatudu bainhira Taur hó delegasaun hosi PLP nian sama ain iha Ótel Novu Turizmu iha Loron Kinta, (10/08/2017) hodi halo dialogu dahuluk nian konaba prosesu formasaun VII governu, bainhira simu husi Marí hodi hakuak metin Taur hafoin lori ba salaun dialogu nian.

Foto MOT/Dionisio da Cruz

Maske nune’e, hafoin dialogu PLP nu’udar terseiru posizaun hó kadeira 8 iha PN ne’e, Taur deklara ba jornalista katak, PLP sei mantein posizaun hela iha Parlamentu Nasional (PN) hó oposisaun. PLP Sei lainvolve hodi halo koaligasaun forma VII governu.

“Hanesan deklara tiha ona PLP sei mantein posisaun iha PN nu’udar oposizaun. No ami PLP laaseita eleisaun antisipada. Signifika prosesu sei lao. Buat hotu-hotu partidu mais votadu maka sei hatene oinsa maka atu simu partidu sira seluk,” hateten Taur hafoin remata dialogu ba loron daruak nian.

Foto MOT/Dionisio da Cruz

Iha fatin hanesan Sekretariu Jeral Partidu FRETILIN, Marí kontenti tanba PLP la aseita eleisaun antisipada. “Loron-loron hau hato’o hela deit mensajem ba povu para fó kunfiansa ba lideransa nasional katak lalika preokupa. Ami sei buka solusaun,” katak Marí hó lia fuan badak.

Hafoin remata koalia ba jornalista Taur hó Marí hakuak malu despedida ikus nian. “Maun (Marí-Red) ba laran ona, ba laran ona,” hateten Taur hó loke liman halo favor nian ba Marí hodi tama fali ba salaun dialogu. No delegasaun PLP tu’un husi eskada hodi ba sa’e kareta.(Reportájem Deonisio/José/Mario)

Leave a Reply

Your email address will not be published. Required fields are marked *