Seidauk Iha Lista Metan, Fretilin Bolu PLP-Khunto Prontu Koalisi

MEDIAONETIMOR– Hafoin durante loron 5 dialogu prosesu formasaun VII governu konstituisional, ikus mai partidu mais votadu, FRETILIN konsege konvense Partidu Libertasaun Popular (PLP) no Khunto halo koaligasaun ba governasaun periode tinan 2017 to’o 2022.

Sekretariu Jeral Partidu FRETILIN, Marí Bin Amude Alkatiri hafoin dialogu loron ikus nian hó Partidu Khunto iha Ótel Novo Turizmu, Sabadu, (12/08/2017) le’e sai   karta deklarasaun Fretilin nian katak sei konvida PLP no KHUNTO tanba partidu rua ne’e seidauk iha lista metan.

DEKLARASAUN FRETILIN NIAN;

Fretilin Rasik hola ona inisiativa hodi hala’o konversasaun ho partidu politiku hotu – hotu ne’ebe hetan reprezentasaun iha Parlamentu Nasional ba lejislatura 2017/2022.

Nune’e, husi loron 9 to’o loron 12 fulan Agostu, hala’o tiha ona konversasaun hanesan tuir mai ne’e:

Ho CNRT iha loron 9 fulan agostu tinan 2017

Ho PLP iha oron 10 agostu tinan 2017

Ho PD iha 11 fulan Agostu tinan 2017

Ho KHUNTO iha loron 12 fulan Agostu tinan 2017

Halo konsiderasaun ba:

  1. Pozisaun ne’ebe partidu politiku idak – idak hatudu no asumi molok kampanha eleitoral, iha kampanha laran no hafoin halo tiha konversasaun sira.
  2. Ta’an presiza duni atu define lalais plataforma entendimentu ida metin no seguru atu garante estabilidade governativa ba tinan lima ninia laran .
  3. Komuñaun ka hanoin hanesan kona-ba politika no programa sira his FRETILIN no partidu balun.

FRETILIN hakotu-lia nune’e:

  1. Konvida PLP no KHUNTO atu ho FRTILIN hahu’u konversasaun substansial atu hari’I plataforma entendimentu ne’ebe metin no seguru guvernasaun nian, no halo definisaun formal ba format adekuadu ba entendementu ne’ebe bele hata’an ba espetativa lejitima ita-nia povu nian.
  2. Mantein dialogu ho partidu politiku sira hotu hodi bele garante politika ida inklusivu liu ta’an atu parlamentu nasional bele sai duni forum ida ba konsettasaun pozisaun hotu – hoto no buka nafatin konsensu ba desizaun estruturante hodi hametin Estado.

FRETILIN sei hato’o ba sua Excelencia Presiden RDTL nian, Dr. Francisco Guterres Lu-Olo atu haklaken formalmente desizaun ne’e.

Dili, loron 12 Fulan Agostu Tinan 2017

Marí Alkatiri

Sekretáriu Jeral FRETILIN

                                                                                                         Taur: “Ami PLP Prontu”

Iha parte seluk maske durante ne’e deklara ona mantein iha posisaun hanesan oposisaun maibé ikus mai Prezidente PLP, Taur Matan Ruak hatan ba konfirmasaun jornalista iha sede PLP Metiaut hateten, prontu atu koalisi.

“Se deklarasaun ne’e tebes, hau agradese hanesan partidu ida foin mak mosu bele hetan ona konfiansa hosi partidu mais votadu para koalisi ho ami,” hateten Taur iha Sede Nasional PLP, Bidau Metiaut Dili, Sabadu, (12/08) maske seidauk simu karta ruma hosi FRETILIN.

Taur hateten, PLP disponivel atu koalisi. Tanba mensajen povu nian liu hosi fahe votus ba partidu hotu-hotu. Ida mesak labele, tenki buka malu. Entaun partidu mais votadu fiar ami hakarak koalia ho ami, disponibel ba koalia reprezenta ami nia eleitoradu ne’ebe fo votus ba Partidu PLP. Ami prontu.

Taur salient, estabilidade lao diak. No saida mak ita koalia ne’e estabilidade Boa Governativa ne’ebe laiha partidu ida mak lakohi Estabilidade Governativa. Maibe iha regras ne’ebé mak tenki tuir.

Nune’e Taur mos salienta katak estabilidade lao diak e saida mak ita koalia ne’e Estabilidade Boa Governativa ne’ebe, “ Hau hanoin laiha Partidu ida mak lakohi Estabilidade Governativa, maibe iha regras ne’ebe tenki tuir.

                                                                                                                KHUNTO Prontu Ko’opera

Husi parté Khunto hafoin remata dialogu iha loron ikus nian hó Partidu Vensedor, Fretilin, Konselheiru Superior Partidu KHUNTO, José dos Santos Naimori ba jornalista hateten, Partidu KHUNTO prontu atu ko’opera ho partidu se’e deit.

Tanba katak Naimori, hotu-hotu iha interese unidade nasional. Ne’eduni nu’udar lideransa, hotu-hotu tenki ko’pera malu. Signifika, povu persija lideransa sira tenki hamutuk.

“Partidu Fretilin mak sei hola desijaun konaba atu forma VII Governu Konstitusional ida ne’ebé diak. Nune’e, Khunto prontu atu servi hó se’e deit. Khunto hakarak kria estabilidade ba nasaun. No tau interese liu ba povu nia moris diak,” deklara Naimori.

Remata hasoru malu hó Khunto, Sekretáriu Jeral Fretilin, Marí rekoñese desde inisiu kampaña, Eleitoral Khunto sempre dehan katak mai hosi Fretilin, ra’an Fretilin. Interese Khunto nian hanesan hó Fretilin nian. Hakarak governu ida estabil para labele monu iha dalan klaran.

“Atu koaligasaun ka la koligasaun, hein segundu dialog iha semana oin mak hatene lolos rezultadu hosi koligasaun ka la koligasaun. Maibé, plataforma ida intendimentu mak tenki defini di-diak,” dehan Marí hasara ba jornalista sira hó hamnasa.

Marí remata intervista hó jornalista dehan, esperensia Fretilin nian durante tinan 10 ne’e importante tebes ba partidu sira seluk atu banati tuir. Tanba, tinan 10 Fretilin iha opozisaun, maibé sempre ko’opera estabilidade no dezenvolvimentu. Nune’e mak kultura politika ida hotu-hotu sei banati tuir.

Enkuanto Fretilin koalisi hó PLP no Khunto maka koaligasaun sei avansa hó 23+8+5= 36 kadeiras iha PN. No koaligasaun sei hela hó CNRT no Partidu Demokratiku (PD) 22+7= 29 kadeiras hodi kompleta kadeira 65 iha Parlamentu Nasional.(Reportájem Deonisio da Cruz/Jose Samuel/ Mario Lobo)

 

Leave a Reply

Your email address will not be published. Required fields are marked *