Inan-Aman Bolseiru Cavo-Verde Rezeita Opsaun ME

MEDIAONETIMOR-Hafoin Ministru Edukasaun (ME), Antonio da Conceicão fó resposta ba atake ne’ebé akontese ba estudante timoroan iha Cavo-Verde liu husi opsaun, nune’e inan-aman sira kontra no rezeita totalmente hodi lakohi simu.

Opsaun husi ME ne’e bazeia ba informasaun hosi bolseirus timoroan iha Cavo-Verde katak, Governu Timor-Leste (TL) liu husi reniaun iha loron 27 Fulan Juñu Tinan 2017 iha Konsellu Ministru, ME, Antonio da Conceição hasai karta sirkular ida hodi haruka ba bolseirus sira ho opsaun rua hanesan:

  1. Mantein no kontinua halao estudu iha Cavo-Verde maske ho situasaun ameasadu nia laran.
  2. Lakohi kontinua estudu iha Cavo-verde ona, deside fila ba TL hodi hakotu kontratu bolsu estudu ho ME.

“Ami husu ba ME atu rezolve problema iha Cavo-Verde, relasiona hó   ME, Antonio da Conceicão hateten iha mídia nasional katak Inan-Aman bolseiru tenke toma responsabilidade ba nia-oan sira.”

Lifuan hirak ne’e hato’o hosi reprezentante Inan-Aman nu’udar Porta Voz, Rui Baptista Dias bainhira le’e Komunikadu Imprensa iha Kampu-Alor semana ne’e.

Hateten Rui, hafoin hetan ataka husi grupu bandidu Cavo-Verde nian, dala barak fó perigu ba liberdade vida moris bolseiru timoroan hodi enkomoda prosesu estuda. Tuir lolos ME toma medidas urjentemente hodi salva no asegura bolseiru nia estudu to’o remata. Laos prejudika hó opsaun sira.

“Ami Inan-Aman no familias bolseiru sira hanesan mos enkaregadu edukasaun kontra mak’as. No rejeita totalmenta opsaun rua ne’ebe ME fó ba bolseirus sira. Tanba opsaun rua ne’e nia implikasaun negativu ba bolseiru sira nia future,” dehan Rui.

Nune’e, Ina- Aman no familia bolseiru sira hakarak hato’o sira nia ezizensia ba ME mak hanesan;

  1. Ezije ba governu TL atraves ME atu foti solusaun ida ne’ebe justu no kreadivel, atu nune’e labele hamate bolseirus nia future.
  2. Husu ba Primeiru Ministru aktual, Rui Maria de Araujo atu labele aseita desijaun ikus ne’ebe ME, Antonio da Conceição foti atu lori fila bolseirus mai TL no hakotu kontratu bolsu estudu.
  3. Husu ba Parlamentu Nasional urjentemente bolu ME, Antonioda Conceição atu esplika lolos problemas ne’ebe bolseirus sira infrenta iha nasaun Cavo-verde ba públiku.
  4. Husu ba Presidente Repúblika, Francisco Guteres Lú Olo atu labele fó legalijasaun ka promulga desijaun ikus hosi ME, Antonio da Conceição maibé tenke fó atensaun atu bele resolve problema ne’e ho diak. Atu nune’e iha nia sustentabilidade ida ne’ebe mak seguru.

Aliende ne’e, Inan-Aman bolseiru sira hakarak husu ba governu TL liu hosi ME urjentemente atu muda ami nia oan sira ba fali nasaun Komunidade Pais Lingua Portugues (CPLP) sira seluk ne’ebé mais votadu hanesan; Portugal no Brazil hodi kontinua sira nia estudu hó hakmatek. Tanba lakohi oan sira sai vitima ba ema ida nia inkapasidade.

Maibé tuir Rui, karik la atende Inan-Aman bolseiru nia ezizensia hirak ne’e maka iha tempu badak sei mantein pozisaun hodi kontinua levanta no lori ba PR Lú Olo nu’udar Aman ba nasaun.

“Nu’udar Inan-Aman ho triste hakatak ható ami nia rekomendasaun ba VII Governu Konstituisional atu mai daun-daun ne’e bele tau iha konsiderasaun hó sentimentu boa fé hodi resolve,” haklaken Prtoa Voz ne’e.(Reportájem Jose Samuel)

Leave a Reply

Your email address will not be published. Required fields are marked *