Kobransa AMD La-klaru, Kondutor Mikrolet Hato’o Keisa Ba CAC

MEDIAONETIMOR-Hafoin liu loron rua halo lansamentu Funsionamentu Estasionamentu Merkadu Tai-bessi husi Ministro de Estado, Coordenador dos Assuntos da Administração do Estado e da Justiça e Ministro da Administração Estatal, Dionísio Babo Soares, kondutor mikrolet sira halo kedas greve hodi husu esplikasaun Autoridade Minisipiu Dili (AMD).

Kondutor mikrolet hó numeru 04, 07 no 08 halai liu dalan terminal Tai-besi nia asaun greve ne’e halo hodi husu esplikasaun ba kobransa ne’ebé la-klaru ne’e ezizi esplikasaun ba dekretu lei numeru 3/2017 konaba Funsionamentu Estasionamentu Merkadu Taibessi.

Asaun ne’ebé sei hala’o husi loron 16 to’o 19 Agostu tinan ne’e tuir Porta Voz mikrolet, Aity Ody Pires lia tún ba Jornalista dehan, sira halo asaun mogok hodi mai ható deklarasaun konjunta ba AMD tanba la-aseita ho dekretu lei No. 3/2017 ne’ebé la-halo sosializasaun antes fó sai.

Aity husu ba AMD ne’ebé fo sai karta iha loron 22 Marsu 2017 bazeia ba dekretu lei ne’e, nusa maka antes Fulan Marsu la-konsulta ho kondutor sira konaba regulamentu kobransa ne’e.

Esplika Aity, husi lei ne’e husu ba kareta públiku ne’ebé tama sai iha terminal Tai-besi kobra mikrolet U$0,25 sentavus kada ret. Kobransa ne’e todan ba kondutor mikrolet sira tanba sei halakon rendimentu kondutor. La-justu tanba Dili iha terminal; Becora, Manleuana, Tasi-Tolu. Maibé, Tai-Besi deit mak selu taxa.

Nune’e Aity husu ba AMD atu esplika lolos lamentasoens hirak ne’e. Enkuantu laiha resposta mak sei kontinua aksaun to’o hetan esplikasaun klaru.

Maske rekuñese nu’udar sidadaun moris iha lei nia okos no hakarak kontribui ba dezemvolvimentu liu husi selu taxa. Maibé dehan Aity, tenki kria uluk kondisaun hanesan haris fatin ba kondutor sira. Labele tur-tur halo lei.

Aliende halo greve hasoru AMD, kondutor mikrolet hirak ne’e hakat liu ba intrega karta deklarasaun konjunta ba iha Komisaun Anti Korupsaun (CAC) hodi husu tahu atensaun ba kobransa ne’ebé konsidera tama idak-idak nia bolsu.

“Tanba osan kobransa ba ida-idak nia bolsu mak ami kondutor sira ne’e hato’o tan karta deklarasaun konjunta ba iha CAC. Ami hakarak hatene osan ne’ebé ami selu ne’e sei ba ne’ebé,” tenik Aity.

Iha tempu ne’e, kondutor mikrolet sira mós husu ba AMD tenke loke bankaria iha banku atu nune’e sira ba selu iha banku. Maibé laos ho lor-loron, sei selu fula-fulan. No tenke ho justu laos tama ida-idak nia bolsu.

Antes ne’e iha loron, Tersa, (15/08/2017) halo ona lansamentu ba Funsionamentu Estasionamentu Merkadu Taibessi bazeia ba dikretu lei numeru 3/2017 husi Ministro de Estado, Coordenador dos Assuntos da Administração do Estado e da Justiça e Ministro da Administração Estatal, Dionísio Babo Soares. (Reprotájen Aderito Ximenes/Estájiada Dulce Ximenes)

Leave a Reply

Your email address will not be published. Required fields are marked *