PLP Tama Iha Inkluzaun, PD Hakarak Tama Iha Prosesu

MEDIAONRTIMOR-Maské koaligasaun mak Fretilin, PLP koaliga inkluzaun no Khunto, lao dau-daun ona hodi hetan maioria absoluta para sustenta governu, maibé atu hetan VII Governu ida ne’ebé maka forte sei involve ema potensial balun husi Partidu Demokratiku (PD).

Sekretáriu Jeral Partidu Fretilin, Mari Bin Amude Alkatiri lia tu’un ba jornalista hafoin remata sorumutu hó estrutura PD iha Ótel Novo Turizmu, (18/08/2017) katak, nia senti kontenti tanba lideransa PD komprende ona posesu atu servisu hamutuk.

Tenik Mari, Fretilin la-manan absoluta maka prontu buka dalan para bele iha plataforma diak atu inklui nafatin rekursu poténsial husi partidu seluk no ema independente husi governasaun foun ba mandatu tinan 2017 to’o 2022.

“Hau hanoin iha komprendesaun katak, PD hakarak tama iha prossesu. No tuir diresaun Fretilin nian sempre iha dalan ida ne’e mak lós duni. PD la ejije buat ida maibe PD hakarak deit kontribui,” haktuir Mari.

Nia esplika liu tan, koligasaun iha. No lao daun-daun ona. Mak Fretilin, PLP, Khunto ne’e para atu hetan maoria absoluta ida para sustenta governu. Sustenta para programa atu halo Nasaun TL buras liu hó 6 H.

“Maibé hau hanoin governu ida ne’ebé atu mai sei forte liu tan. Tanba PLP tama iha inkluzaun. Iha inklusaun ne’e para ema hotu-hotu partisipa iha prosesu. Laos atu hatama hotu iha governu ne’e lae prosesu governasaun,” tenik Mari.

Iha fatin hanesan Presidente PD, Mariano Asanami Sabino hateten, desde inisiu PD sempre dehan katak ba o Timor ami prontu atu servi. Nune’e mak ohin aseita para hola parte atu reabiliza iha VII Governu Kontitusional ida ne’e to’o tinan 2022.

Esplika Asanami, koligasaun para atu hetan kadeira 33 ne’e rekejitus konstitusional. Maibé governasaun aberta ne’ebé mak hanesan ema independente ho ema partidu mak bele tama iha governasaun.

Asanami hatutan, rekejitus konstitusional ne’ebé mak tenke halo tuir, PD tuir konstrusaun Republikaka Demokratika Timor-Leste (RDTL) husu tenke to’o 33 mak bele tama iha rekejitu konstitusional.

“Maibe Governu ida ne’ebé mak nakloke. Hot-hotu fó apoiu ba malu para bele to’o iha 2022,” hateten eis Ministru Agrikultura no Peskas durante mandatu Governasaun Aliansi Maioritar Parlamentar (AMP) iha tinan 7 nia laran.

Antes hakotu intervista, Sekretariu Jeral Partidu Fretilin, Mari hateten nia sei halo proposta estrutura fó ba koligasaun no sosiedade tomak. Ba Presidente Repúblika (PR), Francisco Guterres Lú Olo sei haruka primeira estrutura iha Loron Tersa-feira, (22/08/2017).(Reportájem Jose Samuel)

Leave a Reply

Your email address will not be published. Required fields are marked *