Haluha Sofrementu Vitima, Justisa Futuru Sei Namlele

MEDIAONETIMOR-Atu dignifika vitima sira hodi hametin luta ba lia-los maka justisa sosial tenki hanesan ba hotu-hotu. Nune’e, labele haluha vitima sira nia sofrementu no terus justisa ida agora, sei lae maka justisa futuru sei namlele.

“Justisa laos ita koalia justisa formal deit. Justisa sosial tenki hanesan ba ita hotu. Maibé, atu hametin luta ida ne’e, tenki dignifika vitima sira hodi hametin luta ba justisa sosial no lia-los. Wainhira ita haluha vitima sira nia sofrementu no terus Justisa ida agora, justisa ida futuru sei namlele.”

Liafuan hirak ne’e hato’o hosi Diretor Ezekutivu, Manuel Monteiro iha nia deskursu hodi selebra Aniversariu Lei Direitos Umanus no Justisa (LDUJ) ba dala-21 iha edifisiu Farol Dili, iha semana kotuk.

Aniversariu LDUJ, (Loron, 20 Agustu 1996 – 20 Agustu 2017) ba dala-21 ida ne’e ho tema, dignifika no valoriza sofrimentu vitima sira iha tempu II Guera Mundial atu hametin espiritu luta ba lia los no justisa hodi hakotu korenti impunidade iha Timor-Leste (TL) no Mundu.

Diretur LDUJ, Manuel esplika liutan, iha aniversariu ba dala-21 ne’e organizasaun LDUJ ka Yayasan HAK (Hak Asasi Manusia-Indonezia) bele metin nafatin tanba vitima sira fó nafatin solidaridade no korazen ba organizasaun ida ne’e hodi kontinua hateke buat lós.

Maske katak Manuel, LDUJ iha tempu pasadu koalia konaba lei rezime Ditador Soeharto (Eis Prezidente Repúblika Indonezia) ninian hodi halo presaun no torturas maka mosu movimentu bo’ot para halo defesa ba ativista sira ne’ebé mak hakarak luta ba ukun rasik-an.

Maibé, iha tempu ukun a’an luta ne’e la-hotu. Tanba wainhira sei moris luta hakilar ba justisa no lia los tenki kontinua para futuru justisa iha TL bele metin liutan. Liu-liu justisa sosial ida ne’ebé maka iha agora sei fo forsa ba justisa iha futuru.

Iha seremonia aniversariu ne’e, hamutuk ho belun solidaridade hosi Korea do Soul dignifika vitima atan seksual hosi Militar Japaun, Jugun Ian Fu iha Segundu Guera Mundial nebé kontinua sofre liu dekade 7-resin.

Manuel dehan, desde Fulan Fevereiru 1942 to’o Agustu 1945 rezulta vitima maizu menus nain; Feto foin sa’e sira hamutuk 20 mak sai vitima ba asaun immoral no brutalismu tropas Japones. No timoroan hamutuk 6.000-liu mak hetan obrigatoriamente servisu hodi fo hahan Militar Japones durante tinan rua resin.

“Ohin loron vitima no familia vitima sira hela iha kondisaun mizeravel nia laran. Hamutuk ho belun Koreanu sira, ita fo kondekorasaun medallia nomos dignifika, valoriza sofrimentu vitima sira ne’e hodi hametin espiritu luta ba lia lós no justisa hodi hakotu korenti impunidade iha TL no Mundu,” tenik Manuel.

Iha sikun seluk, vitima Ines Manglhaes Goncalves hosi Munisipiu Ermera husu ba Governu Japaun atu tenki rekoñese hahalok sira ne’ebé mak halo ba vitima atan seksual durante iha tempu okupasaun Militar Japaun iha TL.

“Karik iha sira nia nasaun iha mos Lei Direitus Umanus no Justisa, entaun sira mos tenki rekuiñese vitima violasaun direitus umanus iha Timor-Leste,” dehan vitima Ines hodi hatutan Japaun halo terus hela ba sira bainhira lós mak Governu Japaun rekoiñese sira.

Lia fuan hanesan mai hosi Representante familia vitima atan sexual, Silvina da Costa Freitas. Nia kontinua ezizi ba Governu TL no mos ba Governu Japaun atu rekoñese mos vitima atan sexual iha tempu okupasaun Japaun hanesan mos vitima sira iha tempu okupasaun Indonesia ho emblema veteranus.

“Ami nafatin preokupsaun tanba saida maka veteranos okupasaun Indonesia hetan osan ba sira nia sofremetan kada fulan ho hetan pensaun. Maibé, ami vitima atan sexual okupasaun ba forsa Japaun nian laiha. Ne’e mak duvida bo’ot mai ami vitima atan sexual sira ne’ebé durante ne’e sei senti laran triste no fuan kanek,” katak Silvina.(Reportájem Deonisio da Cruz)

Leave a Reply

Your email address will not be published. Required fields are marked *