Formasaun VII Governu Seidauk Preparadu, Fretilin Maka Husu Adia Posse PN

MEDIAONETIMOR-Posse ba membru Parlamentu Nasional (PN) nian ne’ebé koilleta protesta husi parte balun hodi fó sala fila fali ba parte seluk ne’e tuir lolos Pedidu Partidu Fretilin nian maka husu adia to’o tuir planu sei hala’o iha loron 5 Setembru 2017.

Tuir Prezidente Parlamentu Nasional (PN), Aderito Hugo da Costa, Primeiru Ministru (PM), Rui Maria de Araújo no Prezidente CPN-CDN Partidu CNRT, Dionisio Babo Soares iha fatin diferente ba jornalista hateten, alegasaun absurdo iha rede sosial no lider balun iha orgaun komunikasaun sosial hodi fó sala ba Prezidente Partidu CNRT, Kay Rala Xanana Gusmão ne’e lalos.

Hafoin remata enkontru hó Prezidente Repúblika (PR), Francisco Guterres Lú Olo iha palasiu prezidensial, Prezidente PN, Aderito Hugo da Costa hateten, seisaun parte lejislatura nian ne’ebé fiksa ona iha loron 21 Agostu 2017 tenki adia tanba pedidu husi partidu mais votadu, Fretilin nian.

Esplika Prezidente Hugo, hafoin konvite halo hotu ona ba partidu lima maibé iha loron 21 Agostu 2017 iha pedidu hosi Bankada Fretilin ne’ebe akordu ho rejimentu Parlamentu ninian, husu Prezidente Parlamentu halo konvotariu konferensia liu hosi Bankada extraordinariu iha loron ne’ebé fiksa ona ba toma de posse.

Pedidu konferensia extraordinariu ne’e katak Hugo, nia ajenda prinsipal mak husu adiamentu ba pose ninian. Tanba atu fó espasu tan ba partidu mais votadu para atu halo kontaktu liga ho formasaun VII Governu nian.

“Ne’e regras rejimental mak prevei sekuensia sira hanesan ne’e. No PN fó espasu ba iha konferensia lideres bankada extraordinariu iha loron 21 Agostu 2017 hodi halo diskusaun ba proposta Bankada Fretilin nian. Nomos Partidu Fretilin hanesan Partidu mais votadu atu adia,” haktuir Hugo.

Nia dehan, iha konstituisaun no rejimentu hateten kada mandatu lejislatura ida ne’ebé ninia durasaun tinan 5 ne’e iha nia sesaun lejislativa tinan ida dala ida hahu iha loron 15 Setembru. Kada tinan monu iha loron 15 Jullu. No ano lejislatura tinan lima. Entaum nia hahu bainhira konta ne’e tinan ida.

“Maibé ba tinan espesial ida iha siklus eleisaun Parlamentar nian, kada tinan 5 ne’e depende ba kalendariu eleisaun Presidensial ka eleisaun Parlamentar nia kontinua siklus normal. Ida tinan lima hanesan tinan 2007 no 2012 ka muda tan ba konsekuensia hosi mudansa kalendariu eleisaun Parlamentar nian, sei iha mudansa. Nune’e nia impaktu ba mandatu ne’e atu inisia,” dehan Hugo.

Evita halo alegasaun absurdo Ba Xanana

Iha parte seluk Primeiru Ministru (PM), Rui Maria de Araújo hafoin remata hasoru malu ho Prezidente PR, Francisco Guterres Lú Olo ba jornalista hateten, PR husu ba governu atu haré lalais informasaun balu ne’ebé mai hosi PN konaba tomada de pose ba membru deputadu foun ne’ebe marka ona ba iha loron 5 Setembru 2017.

Tuir Rui, PR mós informa ba governu katak nia akompaña hela prosesu ne’ebe partidu mais votadu iha Parlamentu hala’o formasaun ba VII Governu nian. Nune’e husu para VI governu mantein nafatin servisu de jestaun ba Instituisaun sira hotu hodi hein to’o governu foun simu pose.

Aliende ne’e liu husi akun sosial Facebook, Prezidente CPN-CDN Partidu CNRT, Dionisio Babo Soares fo esplikasaun ba sira ne’ebé lansa informasaun katak tanba Prezidente Partidu CNRT, Kay Rala Xanana Gusmão ba halo negosiasaun tasi timor iha rai liur maka adia tiha tomada de pose. Ne’e lalos.

“Evita halo alegasaun absurdo iha rede sosial, atu informa ba públiku katak Maun Bo’ot Xanana Gusmão nia viajem ba liur laiha relasaun ho inaugurasaun PN foun. Muitu menos formasaun governu foun. Formação Parlamento ho Governo foun depende ba partidu vensedor ho koligasun,” esplika Dionisio.

Nia haktuir, CNRT nu’udar oposisisaun sei submete ba desizaun Parlamentu ho PM indigitado. No sei apoia inkondicionalmente ba questões de soberania nasional, paz no estabilidade. Xanana ba nu’udar negosiador sefi ba assuntu fronteira maritime. No atu defende soberania marítima Timor-Leste nian.

“Hanesan planeadu ona hosi comissão conciliação obrigatória UN nian katak labele halo alegasaun absurdo pois quem não investiga não tem direito a palavra (lian Portugues),” dehan Dionisio hakotu nia avisu ne’e hodi husu atensaun ba públiku para respeitu lideransa ida ne’ebé luta hela hodi kompletu Nasaun TL nia ukun a’an.(Reportájem Deonisio da Cruz/Suzana Cardoso)

Leave a Reply

Your email address will not be published. Required fields are marked *