Povu TL Selebra Manan FM Hó Konvoi, Xanana: “Saida Maka Ita Hakarak, Hetan Ona”

MEDIAONETIMOR Maske desputa Fronteira Marítima entre Timor-Leste (TL) ho Australia sei hein desizaun final iha Holanda, maibé povu selebra nia manan hó hetan ona resolusaun permanente para resolve tuir prinsipiu median line liu husi halo konvoi hodi simu Sefi Delegasaun, Kay Rala Xanana Gusmão.

Dansa tebe-tebe kultura TL nian, akompaña labaraik futuru nasaun lori aifunan tara ba heroi libertasaun Pátria Xanana bainhira tu’un husi aviaun. Laiha lia fuan sai husi ibun ba jornalista, Xanana lao ba dau-daun sae kareta.

Hamrik iha kareta leten, Xanana foti liman ba estudante, militante Partidu Consellu Nasional Rekonstrusaun Timorense (CNRT), veteranus no organizasaun oin-oin ne’ebé ida-idak kaer nia atributu hodi fo viva TL, viva Xanana.

Motorizada hadulas kareta Xanana nian. Balun hamrik iha dalan ninin. Labarik, ferik-katuas hakilar viva Avo Nana. Balun kari aifunan bemvindu lori roman mai ami povu TL.

Iha dalan protokolu hahu husi Aerportu spanduk bobot tara iha dalan ninin hodi fó obrigadu ba Xanana ho nia delegasaun, inklui lider Australianu sira ne’ebé ho laran luak hakarak resolve tuir saida maka direitu TL nian.

Hafoin konvoi ne’ebé hakotu iha Sede Partidu CNRT, Xanana kontinua hó halo konferensia imprensa. No ema idak-idak fahe malu hodi fila ba idak-idak nia fatin. “Ita bele dehan katak, saida mak ita hakarak ita hetan tiha ona,” dehan Xanana hahu nia konferensia imprensa.

Maibé hatutan Xanana, prosesu seidauk hotu. Husi agora sei kontaktu nafatin ho Australia atu estuda textu tratadu nian ba fronteira maritimas hodi lori ba iha enkontru Holanda iha Fulan Outobru nia laran para hetan aprovasaun final.

“Rai ki’ik hanesan ita hó rai bo’ot haleu, mós hein hela buat ne’e lao halo hakmatek. La tuku malu. La hirus malu. Hotu-hotu lao ho kalma,” katak Xanana hodi hatutan.

Ita hotu kontente tanba akordu (Permanent Court of Arbitration-Inglesh) sobre resolução ba Fronteira Marítima entre TL ho Australia konkorda atu resolve tuir prinsípiu Unclos katak median line hó komprimisiu balun. Maibé atu temi dehan ita manan, ita manan tiha ona.

“Ami maka futuru nasaun nian,” derepente labarik sira husi Ensino Baziku Fatuhada hatais farda Batik ne’ebé maka hamrik iha Xanana nia oin hakilar hodi intrompe bainhira koalia hela iha Konferensia imprensa.

Nune’e, hó mata bén turuk Xanana hatan ba labarik sira hodi dehan, “Buat ne’ebé mak hau (Xanana-Red) halo laos ba a’an rasik. Maibé ba imi (Xanana hatudu liman musan ba labarik sira) nia oan sira.”

Responde tiha labarik sira nia hakilar ne’e, Xanana kontinua nia konferensia imprensa katak, maske ita nia povu hatudu ona la fiar hau, Xanana, maibé iha povu nia le’et iha organizasoens barak fo apoiu, fo forsa nomos ho Maromak nia Grasa, Matebian sira nia tulun, ohin ita hotu kontenti fo agradesimentu ba TL.

“Ita agradese ba Maromak tanba Nia bele halo buat hirak ne’ebé maka ita hakarak sai realidade. Rai lulik, foho lulik ba matebian sira hotu hodi fo forsa nafatin atu ita bele haré ita nia luta desputa soberania nian rezultadu,” koalia Xanana ho notas agradesementu.

Konta Xanana ho kecewa ba balun ne’ebé soe piadas ba suseisu ne’ebé hetan ona katak, dalaruma ita lafiar malu iha rai laran maibé hafoin simu posse iha tinan 2004 kria kedas Fundu Petroleo hodi ajuda dezemvolve nasaun ne’e.

Maske nune’e, tenik Xanana, balun mosu mai dehan sira kontorola hodi la konsidera sakrifisiu hirak ne’e. La basa liman oituan katak, ita mak terseiru pais iha mundu tomak. No primeiru iha Asia. Primeiru halo prosesu konsiliasaun iha disputa sira hanesan ne’e. Tamba ita book husi tribunal internasional, dalan laiha. Taka tiha.

Katak Xanana, ohin loron agradese tanba bele manan ona liu husi difikuldade oin-oin. Agradese ba veteranus iha tinan hirak nia laran, sira lao kolen haleu Australia hodi koalia ho veteranos Australia sira hodi asuntu FM la monu ba rai. Agradese mós ba Prezidente Repúblika no komisariu ha’at husi komisaun ne’e no mos membro nain rua husi tribunal permanente ne’ebe akompaña no servisu mak’as, la kolen hodi buka dalan ne’ebé diak ba Asutraila ho Timor-Leste bele hetan solusaun ne’ebé diak.

“Klaru kuandu ita hakarak buat ida lafasil. Maibé, hakrak agradese mós ba Australia ne’ebe to’o ikus sira mós sente dehan, ida ne’e dalan ne’ebé los. Ita tenki liu husi ida ne’e,” haktuir Xanana.

Hatan ba perkupasaun públiku tanba saida maka konferensia imprensa lahalo iha Aeroportu tanba interese nasional nian. Maibé halo fali iha Sede Partidu CNRT, Xanana dehan nia lahatene.

“Maibé atu dehan deit katak, antes atu hakat sai husi TL ba tuir prosesu iha tribunal, ami halo misa ida iha Sede CNRT at oan ida ne’e hamutuk ho Padre ne’ebé hamrik hela iha hau nia sorin ne’e,” katak Xanana hodi hatutan.

Nune’e ohin kalan, (Segunda, 4/9/2017) ami tenki halo fali misa agradesementu ida ba tulun hirak ne’e. No fo obrigadu ba igreja Katolika ne’ebé husu sarani ida-idak atu reza ba negosiasaun ne’e to’o hetan suseisu. E nafatin reza ba ami to’o nia finalidade,” husu Xanana ba Sarani Katolika tomak nia apoiu.

Iha sorin seluk atual Prezidente Partidu CNRT ne’e hateten, nu’udar nasaun ki’ik ida ne’ebé prezisa apoiu mundu tomak nian, TL tenki nafatin fo apoiu ba nasaun hirak ne’ebé frazil iha demokrasia, governasaun, direitus humanus no iha buat oin-oin.

Katak Xanana, frazil balun foin hakotu sira nia komflitu. Balun sei iha komflitu laran, husu TL nia apoiu atu ajuda sira. Nune’e, presiza koalia sai bei-beik ba komunidade internasional atu tau uluk dignidade humana. Maske dala barak, sira tau uluk kbi’it. Katak sira maka iha poder dignidade humana. Respeitu ba pais sira seluk tamba iha respeitu ba dignidade humana.(Reportájem Aderito Ximenes/Estájiadu Sancho da Cruz)

Leave a Reply

Your email address will not be published. Required fields are marked *