Prezidente PN Eleitu Komprimenta PR Lú Olo Kunvida Abertura Lejislatura

MEDIAONETIMOR-Atu hatudu sentidu ko’operasaun no solidaridade institusional entre orgaun estadu maka hafoin eleitu ba Prezidente Parlamentu Nasional (PN), Aniceto Guterres Lopes ba komprimenta Prezidente Repúblika (PR), Francisco Guterees Lú Olo.

“Meja PN foin maka kompletu ho nia Prezidente, vice Prezidente, Sekretariu, vice Sekretariu. Nune’e, ami mai komprimenta PR, Lú Olo hodi hatudu sentidu kooperasaun, sentidu solidaridade institusional entre Orgaun Estadu.”

Lia hirak ne’e kasu hosi Prezidente PN eleitu, Aniceto ba Jornalista hafoin remata komprimenta ho PR, Lú Olo iha Palasiu Prezidensial, foin lalais ne’e.

Nia esplika liutan, aliende kumprimenta, iha tempu ne’e kunvida mós PR Lú Olo para loke sesaun lejislativa parte lejislatura IV nian iha loron 15 Setembru 2017.

Entretantu Prezidente PN, Aniceto, afirma, sira hetan mós felisitasões hosi PR Lú Olo ba membru Deputadu foun ne’ebé ho susesu forma ona meja PN.

Relasiona ho prosesu formasaun VII Governu, Aniceto haktuir PN laiha buat ida ho formasaun governu. Tanba ne’e, nu’udar meja PN nian laos meja partidu nian.

Hatan ba Lei lejislatura antes nian, Aniceto salienta, PN sei iha periodu atu hadia no halo tranzisaun III lejislatura ba IV lejislatura. Nu’udar, orgaun kolezial, desizaun Parlamentu kolezial.

“Laos desizaun Prezidente Parlamentu nian deit. E laos Prezidente PN mesak maka halo. Maibé depende dinamika PN ninian,” katak Prizedente PN ne’ebé mai husi Partidu Fretilin.(Deonizio da Cruz)

Leave a Reply

Your email address will not be published. Required fields are marked *