PM Rui Aprezenta Gastus OJE To’o 100% Ba PN, VI Governu Labele Foti Desizaun Foun

MEDIAONETIMOR-Exekuzaun orsamentu lao nafatin. Órgaun no servisu sira iha ministeriu nia laran nafatin hala’o sira nia servisu hodi to’o tama ba semana daruak iha Fulan Setembru tinan 2017 ne’e gastus Orsamentu Jeral Estadu (OJE) to’o 100% ona.

“Órgaun no servisu sira ne’e iha ministeiru nia laran nafatin hala’o sira nia servisu. No Sesta feira horseik ne’e exekusaun orsamentu kuaze to’o 100%. Maske sira seluk to’o deit purvolta 70%.”

Lia fuan hirak ne’e kasu hosi Primeiru Ministru (PM), Rui Maria de Araújo ba jornalista hafoin remata hasoru malu ho Prezidente Parlamentu Nasional (PN), Aniceto Longuinhos Guterres Lopes iha uma fukun.

PM Rui esplika liutan, servisu jestaun no exekusaun orsamentu iha ministeriu sira lao hanesan bain-bain. Maibé dezisaun foun maka labele halo, tanba preparasaun atu entrega husi VI Governu ba VII Governu konstituisional.

Katak Rui, governu relata prosesu gastus OJE 2017 nian ne’e ba IV lejislatura ne’ebé foin maka hetan posse ne’e, nu’udar obrigasaun ba órgaun soberania ida ne’ebé fiskaliza mós aktividade governu nian.

“Governu jestaun. Maibé PN ida ne’e iha autoridade mós atu fiskaliza. Nune’e mak ohin mai hato’o komprimentus formais no relatoriu ida kona ba funsionamentu nian iha ambitu solidaridade institusional,” dehan Rui.

Aliende ne’e katak PM Rui, iha hasoru malu ne’e hodi koalia konaba mekanizmu atu ko’ordena ba servisu, prosesu preparasaun kona-ba orsamentu ba oin no problema hirak ne’ebé VI Governu Konstituisional sei infrenta.

Katak PM Rui, esperensia VI governu enfrenta liu husi PN maka aprovasaun programa governu nian ho orsamentu ratifikativu. Nune’e, iha hasoru malu ne’e mós fo baze ba entendementu politika ne’ebé maka iha atu esplora posibilidade para halo mudansa ba tinan finanseiru.

Remata hasoru malu hateten Rui, intrega mós retratu VI Governu Konstitusional konaba aktividade hotu-hotu ne’ebé mak halo iha tinan 2 ho balun ba Prezidente ho Vise Prezidete PN. Livru retratu ne’e lansa tiha ona iha Loron 4 Agostu 2017.

“Livru retratu Governu ne’e dokumentu ida ne’ebé VI Governu prepara konaba aktividade hotu-hotu ne’ebe mak halo iha tinan 2 ho balun. Públikasaun informasaun livru ne’e lansa tiha ona. Fahe ona ba públiku. Ohin mai entrega mós kopia ba Prezidente ho ninian Vise PN,” tenik PM Rui.

Iha fatin hanesan Prezidente PN, Aniceto hateten, PM Rui mai fo komprimentus ofisialmente ba meja IV lejislatura. Entre Parlamentu no governu komprimenta malu deit. Tanba, VI Governu Lejislasaun sei labele ona hola desizaun importante.

“Husi PN nia parte, ohin hato’o ba PM atu asegura didiak transferensia iha transesaun husi VI Govenu ba iha VII Governu ho normal. Katak, hotu-hotu bele sente estadu funsiona ho normal,” dehan Preziente PN, Aniceto.(Reportájem Hilario Silva/Dulce Ximenes)

Leave a Reply

Your email address will not be published. Required fields are marked *