Khunto Lakohi Koliga, Fretilin-PD Kontinua Asina Plataforma Forma Governu

MEDIAONETIMOR-Maske Partidu Politiku Khunto la-partisipa maibé Partidu Demokratiku (PD) hó Fretilin kontinua asina plataforma koligasaun hodi forma VII Governu Konstitusional ho kandidata Mari Bin Amude Alkatiri sai Primeiru Ministru.

Tuir Sekretariu Jeral Partidu Fretidu Fretilin, Mari Bin Amude Alkatiri, Prezidente PD, Mariano Asanami Sabino, Xefe Estadu Falintil-Forsa Devesa Timor-Leste (F-FDTL), Major Jeneral Lere Anan Timur ba jornalista iha fatin diferente hateten, koligasaun atu ukun Timor-Leste (TL) dura to’o tinan 5.

Tuir Sekjer Fretilin, Mari Bin Amude Alkatiri, Partidu Khunto iha problema interna. Lalika dada tan tempu ba sira la partisipa asina plataforma koligasaun. Nune’e, Fretilin no PD deside avansa ba koligasaun hodi forma governu.

“Hau kumpriende problema Khunto nian. Maibé, ita lalika dada tan tempu. Agora tempu to’o ona para forma governu. Bainhira governu simu pose ona maka foin hahu fali dialogu no negosiasaun ho partidu sira seluk hodi hare oinsa maka atu servisu hamutuk,” dehan Mari.

Konaba kadeira la-priense kriteria aprovasaun tenik Mari, iha Parlamentu deputadu sira vota maka garante estabilidade. Koligasaun ka la-koligasaun depende ba koligasaun, inkluzaun no insidensial parlamentar. Laiha koligasaun bele kontinua ho insidensial parlamentar ka inkluzaun.

Hatan ukun ho minoridade kadeira iha PN sei garantia VII Governasaun? “Hau la garante. Sosiedade maka tenki garante governasaun ida ne’e dura to’o tinan 5. Se-hakarak atu ukun rai ne’e ho di-diak laos Fretilin mesak maka garante. Povu ho sosiedade tomak maka tenki garante,” tenik Mari.

Tahu Ás Interese Estadu

Iha sikun seluk Prezidente PD, Mariano Assanami Sabino konta, bainhira Fernando Lasama de Araújo mate nia hameno para interese estadu tahu ás liu a’as interese individual nian. Nune’e maka desde inisiu prontu ho slogan, ‘Ba o Timor, Ami Maubere Oan prontu atu servi.

Katak Assanami, PD servi laiha kondisaun. Laiha ejizensia. Iha risku oin-oin. Maibé, kontinua kaer nafatin servi Timor ba oin. PD sempre prontu ba o Timor, ba ho se deit, iha fatin ne’ebe deit. Laiha rezerva servi rai ida ne’e.

“ Ukun ne’e povu nian, hamutuk ita bele, se ukun ne’e povu nian ita tau forsa hamutuk fo apoiu malu para atu veabiliza ukun povu nian ne’e. Servi fali ba povu sira. PD kontinua nafatin ba oin ho nia firmeza. Asina plataforma koligasaun ho Partidu Fretilin hodi konsistensia nafatin para ukun hodi servi no dignifika Timor oan tomak. Labele mosu diskriminasaun ba ema hotu,” dehan Assanami.

Laos Hadau Malu Kadeira

Entertantu Xefe Estadu F-FDTL, Major Lere Anan Timur ba jornalista husu ba lider hotu-hotu katak koliga laos atu hadau malu kadeira. Koliga atu ukun rai doben TL. Lider partidu politikus sira labele aproveita situasaun.

“Koliga laos atu buka fatin diak ba ema ida-idak. Maibe ita tenki servi povu no servi ba nasaun. Iha kampaña hotu-hotu promote, kuandu manan tenki servi Estadu. Laos Estadu maka servi fali ita. Labele aproveita sai membru Governu atu halo diak ba nia-an deit ne’e labele akontese,” katak Lere.(Reportájem Deonisio da Cruz)

Leave a Reply

Your email address will not be published. Required fields are marked *