La-simu Sai Nain Ba Koligasaun, Khunto Hili Oposisaun Ho CNRT-PLP

MEDIAONETIMOR-Tanba Partidu Politiku Fretilin lakohi simu prinsipiu hakarak buat hotu-hotu tenki sai hanesan nain ba koligasaun maka Partidu Khunto foti desizaun hakarak sai nu’udar opozisaun hamutuk ho PLP no CNRT iha uma fukun Parlamentu Nasional (PN).

“Laos ami lakohi fo kontribuisaun ba rai ida ne’e. Maibé ho prinsipiu hakarak buat hotu-hotu tenki sai hanesan nain ba koligasaun. Razaun ne’e mak ami foti desizaun hakarak sai nu’udar opozisaun. Maibe laos atu fahe malu. Iha buat ida maka lakohi bosok no hatudu katak ita ida deit.”

Lia fuan hirak ne’e kasu hosi Konsellu Superior Partidu Khunto, José dos Santos Naimori Bukar iha konfrensia imprensa ne’ebé hala’o iha sira nia Sede Surikmas, Kinta, (14/09/2017). Nia hateten, tó agora laiha oportunidade ida dehan atu koliga ka lae. Khunto maka sés a’an deit.

Naimori esplika liutan, razaun fundamental Khunto sés a’an hosi formasaun VII Governu Koligasaun tanba laiha ko’operasaun diak. La-respeitu malu entre lideransa. La-nakloke ba malu. Politika hotu-hotu tenki tau iha meja para sai nain ba koligasaun.

Katak Naimori, Fretilin temi formasaun VII governu ida ne’e koligasaun. Maibé la-nakloke ba partidu koliga ne’ebé maka atu involve. Khunto hein Fretilin hakarak ko’opera para hatudu unidade ida diak ba povu.

“Ami hein horiseik (Kuarta, 13/09/2017) ho ohin (Kinta, 14/09/2017) para Fretilin mai, ami lao hamutuk atu bele asina akordu koligasaun. Maibé rejultadu hatudu katak Fretilin lakohi ko’opera ho ami. Nune’e maka sira la mai bolu ami,” deklara Naimori.

Naimori konta, Khunto hatudu ona ninia ko’operasaun iha loron 4 Setembru 2017 ho Fretilin haforsa Parlementu. Khunto hetan rejultadu diak. To’o fali atu ba governasaun nian presiza partidu 3 ne’e ninia hamutuk. Ho hanoin ida deit para bele lao ho diak. Laos atu hirus malu.

Atu povu sente livre no hakmatek tenik Naimori, hotu-hotu iha oportunidade apoiu malu nafatin para guvernu foun bele lao ho estabilidade ne’ebé diak. Modelu oposisaun Khunto nian maka atu hatudu iha Parlamentu hosi programa ida ne’ebé maka bele kria kondisaun ba povu hotu-hotu.

“Partidu Khunto husu deskulpa ba timoroan tomak tamba latama iha formasaun VII guvernasaun relasiona ho kondisaun politika. Husu hotu-hotu hakmatek. Idak-idak hala’o aktividade hanesan bai-bain,” husu Naimori hodi hatutan.

Khunto la-tama laiha problema. TL agora tenki kria estabilidade. Nasaun tenki iha paz nia laran. Maske povu bele hanoin lideransa sira la-hamutuk, entaun povu sei la hakmatek. Laos partidu maka fo hán povu. Maibe povu rasik mak fo hán nia a’an. Partidu atu lori deit povu nia aspirasaun ba iha parlamentu.

Hanesan hotu-hotu hatene ona, hosi Partidu Khunto ba hamutuk oposisi ho CNRT no PLP nune’e total oposisiaun mak hanesan; CNRT kadeira 22, PLP kadeira 8 no Khunto kadeira 5. Hamutuk kadeira 35 ba oposisaun. No kadeira Fretilin 23 no PD kadeira 7 nu’udar partidu koliga hamutuk 30. Sai duvidas ba públiku.(Reportájem Mario Lobo)

Leave a Reply

Your email address will not be published. Required fields are marked *