Tanba Responsabilidade, SEJD Leovijildo Kontinua Servisu

MEDIAONETIMOR-Tanba responsabilidade Estadu, moral no politika maka Sekretáriu Estadu Joventude Desportu (SEJD), Leovegildo Hornay kontinua servisu hodi hein desijaun hosi Partidu Koligasaun Minotária nia desijaun.

“Hau hanoin VII Governu ne’ebé atu mai troka, labele pratika kolusaun no nepotizmu. Tenke anti korupsaun. Tenke hametin Boa Governasaun. Kaer metin prinsipiu transparansia. Garantia katak labele politiza instituisaun SEJD. Labele politiza servisu burokrasia nian.”

Hatan SEJD, Leovegildo Hornay ba jornalista, Tersa, (19/09/2017) bainhira husu konaba transformasaun VI ba VII Governu Koligasaun Minotária iha SEJD ne’ebé mak seidauk realiza.

Nia esplika liutan, nu’udar servidor estadu preparadu ona atu simu desijaun hosi politikus sira ne’ebé maka atu mai troka kargu ne’e. Kuandu seidauk iha Sekretáriu Estadu foun, servisu tenke kontinua lao.

Leovigildo hateten, servidor profeisional servi ho integridade no responsabilidade. Hatudu sentidu patriotismu no nasionalismu. Hakarak sai servidor ida diak, nunka sura ba nia kolen. Nune’e, fatin ne’e sei lahusik mamuk to’o foun mai troka.

“Hau hateten, servisu ba povu iha rai Nasaun Timor-Leste (TL) la presija iha mandatu ka konfiansa. Tanba ne’e mak hau hakarak servisu nafatin. Importante mak ami hot-hotu preparadu hodi hein seluk atu mai para hatutan programa politika VI Governu Konstitusional ida ne’e,” husu Leovegildo.

Hatan konaba semaka sei mai lidera SEJD iha VII Governu Koligasaun Minotária, Leovegildo responde dehan, “Hau seidauk hatene. Depende nai ulun, politiku ka lider sira atu disidi. Hau tama ho dignidade. Fila mós ho dignidade. Konvida hau ho respeitu, no hau husik mandatu mós ho respeitu,” tenik Leovegildo.(Reportájem Jose Samue/Deonisio da Cruz)

Leave a Reply

Your email address will not be published. Required fields are marked *