Hadia Promosaun Kafé TL Ba Mundu

MEDIAONETIMOR-Maske kafé Timor-Leste (TL) tama ona fabrika kuñesidu iha mundu, Star Back. Maibé Governu tenki kapasita agrikultura sira konaba marketing no hadia promosaun liu hosi aproveita selebrasaun loron mundial plantasaun kafé ne’ebé monu iha loron, 1 Otubru 2017.

“Se’e ita selebra loron plantasaun kafé maka bele fó hanoin ba agrikultura, oinsa sira nia produsaun. Prosesu fa’an kafé folin diak ka lae. Ho marketing, para halo promosaun diak liutan iha nivel rejional no mundial. Estadu no governu tenki fó atensaun hadia ninia promosaun ba mundu.”

Ezijensia ne’e hato’o hosi Deputadu Bankada Partidu Libertasaun Popular (PLP), Maricio Juvinal iha plenaria uma fukun Parlamentu Nasional (PN), Segunda, (02/10/2017) relasiona ho selebrasaun loron mundial plantasaun kafé ne’ebé tinan-tinan selebra iha loron ida Fulan Otubru.

Maricio esplika, Timor-Leste (TL) iha plantasaun kafé. Maske exportasaun sei ki’ik, maibé nia produsaun kafé tama ona star Back hodi konsege lori TL ba mundu internasional. Nune’e, presiza halo promosaun tantu ba agrikultura sira konaba kualidade kafé no ba marketing mundu nian.

Katak Maricio, ba marketing mundu nian ho hola parte iha selebrasaun loron plantasaun kafé mundial, sei ajuda halo promosaun ba ema estranjeiru atu kuñese diak liutan kafé TL nia kualidade.

“Hahu agora ba oin maka ita konsidera, 01 Otubru hanesan loron mundial ba plantasaun kafé hodi selebra hamutuk ho agrikultutra sira, ne’e nu’udar parté kontribuisaun promosaun Estadu no Governu nian,” hateten Maricio hodi fo parabéns ba agrikultura plantasaun kafé nian.

Hateten Maricio, ba nasaun hirak ne’ebé maka iha produsaun no exporta kafé, iha loron 01 Otubru tinan-tinan ida-idak selebra ho sira nia aktividade hodi harame no hafanu agrikultura sira nia espritu kuda kafé.

Iha TL katak Maricio, kafé konsidera hanesan seitor naun petroliferu. Maske ho produsaun sei ki’ik maibé hahu kontribui ba rendimentu estadu nian. Nune’e, agrikultura kafé tenke hetan atensaun masimu liutan para tama ona iha promosaun mundial nian.(Reportájem Aderito Ximenes)

Leave a Reply

Your email address will not be published. Required fields are marked *