VII Governu Hakarak Hasai Povu Hosi Mukit No Kiak

MEDIAONETIMOR-Iha VII Governu Konstituisional laos departementalista no ministeriu deit. Maibé sei realiza programa ho hanoin disiplinar ne’ebé refleta interese nasional no povu nian hodi hasai sira hosi kiak no mukit.

Hateten bankada partidu Governante Frenti Revolusionariu Timor-Leste Independente (Fretilin), Francisco Miranda Branco no Partidu Demokratiku (PD), Maria Teresa Gusmão ba Jornalista iha uma fukun Parlamentu Nasional (PN) iha semana ne’e.

“Hau hanoin VII Governu laos departamentalista. Laos ministeriu ida sai fali governu ida. Maibé, governu ida mesak deit ne’ebé derije ho programa ida deit. Hanoin ho disiplina ida ne’e ami fiar sei atinji saida deit mak ita hakarak,” dehan Prezisente Bankada Fretilin, Francisco Miranda Branco.

Nia hatutan, ho programa ida ne’ebé sei refleta laos deit interese nasional nian maibé atu hasai povu hosi kiak no mukit maka, maske VII Governu minoria parlamentar maibé fiar nia programa sei liu iha PN. Tanba, antes atu hetan aprovasaun, sei uza mekanizmu husu konsulta uluk ba bankada sira.

Aliende konsulta ho bankada katak Francisco Branco, sinal positivu seluk atu programa VII Governu minoria parlamentar ne’e passa maka konfigurasaun Gabinete membru governu nian ne’ebé politikamente bele garantia estabilidade governativa.

“Objetivu estratéjia hosi VII Governu nian sei husu konsulta bankadas hot-hotu para fila ba, sira ida-idak nia hanoin programa ida ne’ebé bele interese nasional no povu nia dezenvolvimentu iha Estadu Timor-Leste,” tenik Francisco Branco.

Povu Nia Moris Diak

Lia fuan hanesan husu hosi Prezidente Bankada PD, Maria Teresa Gusmão. Nia hateten, nu’udar reprezentante povu iha uma fukun PN, deputadu sira tenki tau a’as interese povu nian atu hasai sira hosi kiak no mukit. Tempu ona ba povu terus nain atu moris diak.

“Iha VII Governu sei barak hanesan anterior, tanba pragmatika lasufisiente atu halo servisu tuir idak-idak ninia kna’ar ho efisiente, efikas no transparensia hodi atinji povu nia nesesidade atu hasai sira hosi kiak no mukit. Nune’e hotu-hotu tenki tulun malu no fo liman ba malu,” sujere Deputada Maria Teresa.

Nia esplika hodi responde sira ne’ebé kestiona Sekretáriu Jeral Fretilin, Marí Bin Amude Alkatiri ne’ebé la konsisten haklo’ot estrutura governu katak, kompozisaun governu anterior kuaze nain 38. Formasaun VII Governu kuaze 35 ne’e depende nesesidade servisu governu ba povu nian.

Maibé Deputada Maria Teresa dehan, total membru governu laos konstan. Bele muda. Importante maka mudansa ne’e bazeia ba konstituisaun no nesesidade povu nian moris diak, harmonijasaun, estratejia no estabilidade.

“Hotu-hotu tenki optimista. Tenki konsiensia. Programa VII governu la passa se’e maka responsabiliza. Tanba sa maka la passa. Tantu opozisaun ka koligasaun, hotu-hotu tenki optimista ho koniensia ida deit. Tenke passa orsamentu atu povu nia moris diak,” katak Maria Teresa.(Reportájem Jose Samuel/Estajiada Dulce Ximenes)

Leave a Reply

Your email address will not be published. Required fields are marked *