Defisiénsia-Terminal-Edukador- Zebra cross-Jornalista To’o Muda Tu’ur fatin Deputadu, Sai Asuntu Sosiais Plenáriu PN

MEDIAONETIMOR-Reprezentante povu iha uma fukun Parlamentu Nasional (PN) liu hosi plenária, Segunda, (09/10/2017), konsege detekta asuntu sosiais lubuk balun ne’ebé maka presiza hetan konsiderasaun hosi VII Governu hanesan tuir mai ne’e;

  • Defisiénsia menus asesu ba fatin públiku. Tuir konstituisaun RDTL, artigu 21 Sidadaun ne’ebé iha defisiénsia, numeru 2 hateten; Estadu, wainhira bele, promove protesaun ba sidadaun sira-ne’ebé iha defisiénsia, tuir lei haruka. Maibé, tuir Deputada Elbina Sousa hosi Bankada Partidu Demokratiku (PD) nia observasaun, ema defisiénsia menus asesu ba fatin no edifisiu públiku. Lolos ne’e Ministeriu Negosiu Estranjeiru no Ministeriu Solidaridade social maka tenki fo espasu ba sira. Nune’e, rekomenda ba Ministeriu Obras Públiku wainhira halo konstrusaun ba iha edifisiu públiku atu fo espasu asesu ba ema difisiénsia sira. Tanba, difisiénsia sira nu’udar mós dezenvolvimentu ba sosiadade nia laran.
  • Prepara terminal adekuadu. Iha plenária ne’e, Deputada Elbina Sousa hosi Bankada PD ne’e mós observa asuntu sosiais ba ema hirak ne’ebé maka ba hein transporte públiku iha terminal Tasi-Tolu, Hali-laran no Becora la-ho fatin ne’ebé maka adekuadu. Suzere ba Ministeriu Obras Públikus atu hari’i mahon ba pasajeirus sira satan hosi loron manas, rai rahun, maho be’en no udan.

 

  • Zebra cross nia tinta komesa lakon. Asuntu sosiais importante seluk tuir Deputada Elbina Sousa sei nafatin hosi Bankada PD, mak zebra cross nia tinta mutin kumesa lakon ba dau-daun ona. Motorista sira hare lamós, sei prejudika sira ne’ebé maka hakat hosi estrada sorin ba sorin seluk.

 

  • Laiha importansia halo mudansa ba tu’ur fatin deputadu sira. Iha plenária, Segunda, (09/10/2017) ne’e Depuatada Ilda Maria hosi Bankada Frente Revolusionariu Timor-Leste Independente (Fretilin) lamenta ho halo mudansa ba tu’ur fatin deputadu sira iha sala plenária. Hahalok muda tu’ur fatin deputadu sira ne’e hatudu nu’udar reprezentante povu, la-iha; hahalok konsolida unidade nasional, hatudu fahe-malu no sei-kotuk ba-malu. Tuir lolos deputadu sira tenki tahu a’as nia dever importante maka define interese povu nia moris diak no saudavel. Nune’e, deputadu sira mesak Timor-oan deit no mesak ida deit labele hafahe malu.

 

  • Edukador baze fundamentu edukasaun. Aliende ne’e, hosi partidu oposisaun Partidu Libertasaun Pátria (PLP), Mericio Acara husu atu fó atensaun ba edukador (mestra sira-Red) sira iha area rurais infrenta menus fasilidade, vensimentu ki’ik no oportunidade hasae kapasidade limitadu. Nasaun TL atu ba oin, Timor-oan tenki matenek iha kapasidade no koñesementu. Maibé, depende ba kapasidade hosi edukador sira.

 

  • Jornalista la-profesionál hodi provoka situasaun. Parte seluk, Prezidente Bankada Partidu oposisaun Consellu Nasional Rezistensia Timorense (CNRT), Deputadu Arão Noe iha plenáriu kestiona produtu jornálista sira iha públikasaun notisia. Titulu notisia ne’ebé foti hosi jornálista hodi públika iha jornál nia konteudu bele analiza. Maibé hafoin foti sitasaun (kutipan-lian Indonezia) rohan deit públika hikas fali iha facebook, ne’e maka provoka situasaun. Tamba, ema la-intende saida mak deputadu ka intervensaun ne’ebé halo. Nune’e, husu ba jornalista sira para labele halo asaun politika. Presiza públika informasaun kompletu hodi ema hotu esklaresidu ho asuntu ruma.

 

  • Husu deputadu sira atu implementa lei komunikasaun social. Deputada Carmelita Caetano Moniz hosi Bankada CNRT reforsatan levantamentu hosi Deputadu Arão Noe hodi hateten, ba mídia ne’ebé mak públika notisia nakonu ho informasaun provokativu husu para Konsellu Imprensa (KI) atu halo avaliasaun hodi implementa Lei Komunikasaun Sosial ba mídia hirak ne’e. Hanesan mós ba deputadu sira ne’ebé mak sai vitíma ba públikasaun notísia, husu atu diak liu implementa lei komunikasaun social para ezizi mídia sira nia públikasaun informasaun ho liberdade. Maibé nakonu ho responsabilidade.(Reportájem Jose Samuel/Estájiada Dulce Ximenes)

Leave a Reply

Your email address will not be published. Required fields are marked *