Manda Proposta Programa Ho Lian Portugés Deit, Khunto Sei Vota Abstein

MEDIAONETIMOR– Tanba proposta programa VII Governu hakerek ho lian Portugés hodi fo impaktu ba kumpriendesaun kontiudu nian la-ho didiak maka ida hosi partidu oposisaun maioria parlamentar, Khunto, promete sei vota abstain.

“Ami hakarak eziji nafatin, se-bele karik proposta programa VII Governu ne’e fo versaun tetun para ami kompriende muito bém. Tanba Bankada Khunto sei vota fora, bainhira hakerek ho lian Portugés deit.”

Deklara Prezidente Bankada Partidu Khunto, Deputadu Luís Roberto da Silva hodi responde jornalista konaba proposta VII Governu nian ne’ebé haruka ona ba uma fukun Parlamento Nasional (PN) hodi deskute durante loron 5, hahu loron 16 to’o 20 Otubru 2017.

Maske konstituisaun hatu’ur ona katak;

Artigu 13

(Lian ofisiál no nasionál)

  1. Repúblika Demokrátika Timór-Leste nia lian ofisiál maka Tetun no Prtugés.
  2. Estadu valorize no dezenvolve Tetun no lian nasional sira seluk.

Deputadu Luís hateten, molok atu fo apoiu ba programa VII Governu nian ne’e tenke hatene didiak no klaru. Nune’e tenke hakerek ho lian ne’ebé maka halo ema ineterese banati tuir maka tetun.

Maibé katak Deputadu Luís, proposta programa ne’e maka nafatin domina hakerek ho versaun Portugés, Bankada Khunto sei abstain tanba la-kompriende. Khunto lakohi hetan emblema ikut arus-Indonezia (sulin tuir deit).

Kna’ar Partidu oposisaun maka halo audit ba programa no orsamentu VII Governu nian antes atu aprova hodi implementa. Tuir Deputadu Luís, eziji ba Prezidente PN para koordena ba kualker testu mai PN tenki ho versaun tetun.

Khunto ho votus 5 deit, maibé nia impaktu bo’ot ba aprovasaun. Satán VII Governu nu’udar minoria iha Parlamentar.

Dezenvolvimentu hosi Kraik

Iha parte seluk Prezidente Khunto ne’e hakarak atu implementasaun programa VII Governu tenki dezemvolve hosi povu iha area rumotas maka sae mai to’o mai munisipiu no nasional.

“Hanesan partidu ne’ebé maka segundu mais votadu, CNRT maka lidera ami PLP ho Khunto. Lidera para atu kria oposizaun unidade ne’ebé maka forte ba kuida programa VII Governu no gastus orsamentu nian. Area rumotas maka baze ba konstrusaun dezenvolvimentu,” hateten Deputadu Luís.

Ho lia fuan diplomasia Deputadu Luís hatutan hodi fo hanoin ba partidu minoria kaer governu katak, hosi Bankada CNRT, PLP no Khunto hala’o kna’ar opozisaun iha PN hosi autor ba partidu politika.

“Katak, iha duni autorizasaun hosi prezidente ba iha CNRT. Ba iha PLP. No autorizasaun hanesan mai mós hosi konsellu superior ba iha Khunto. Lider sira ne’e maka fo dalan mai ami bankada 3 ne’e hodi hala’o komunikasaun politika,” haklean Deputadu Luís.( Estajiada Dulce Ximenes)

Leave a Reply

Your email address will not be published. Required fields are marked *