Respeitu Konstituisaun, Oposisaun Forma AMP

MEDIAONETIMOR-Atu hametin liutan konsentrasaun politika entre bankadas parlamentares hodi respeitu lei no regras iha Konstituisaun Repúblika Demokrátika Timor-Leste (RDTL) fo dalan maka Partidu oposisaun ne’ebé maioria iha Parlamentu Nasional (PN) forma Aliansa Maioria Parlamentar (AMP).

Bazeia ba Konstituisaun RDTL ne’ebé fo dalan iha artigu 1 to’o artigu 15 konaba prinsípiu fundamental sira, maka oposizaunCNRT, PLP no Khunto forma AMP ne’e liu hosi asina plataforma politika, kompletu ho; prinsipiu no vizaun nomos objetivus.

“Ho plataforma politika ne’ebé maka asina iha loron, (12/10/2017) atu hatudu ba públiku katak, asaun ne’ebé halo, laos bankada mak ho inisiativa rasik. Maibé koñesementu no ho autorizasaun husi partidu politiku nian,” hateten Prezidente Bankada CNRT, Deputadu Arão Noe de I. da C. Amaral iha nia deskursu hafoin remata asina plataforma hodi reprezenta Partidu CNRT nian.

Hatutan Deputadu Arão, hari’i plataforma politika AMP ne’e kontinuasaun hosi karta ne’ebé maka haruka ona ba Prezidente Repúblika (PR), Frnacisco Guterres Lú Olo iha semana kotuk para konretiza interpretasaun ba aktividade bankada oposisaun hetan koñesiementu hosi Partidu Politika tolu ne’e.

Iha parte seluk Prezidente Bankada Partidu Libertasaun Polular (PLP), Deputadu Fidelis M.L. Magalhaes esplika, plataforma politika AMP ne’e halo atu hametin liutan konsentrasaun politika entre bankada parlamentares ne’ebé maka konstituisaun RDTL fo dalan.

“Atuasaun ne’e politikamente tuir Konstituisaun RDTL. Katak, iha responsabilidade ba partidu sira ne’ebé maka maioria iha parlamentu atu konserta sira nia politika hodi lori dezemvolvimentu no moris diak ba povu. Tanba, wainhira atu implementa ita nia programa, implementa mós ita nia politika iha PN, presija iha apoiu maioria,” dehan Deputadu Fidelis.

Esplika Deputadu Fidelis, Partidu Congresu Nasional de Reconstrução de Timor-Leste (CNRT), PLP no Kmanek Haburas Unidade Nasional Timor Oan (Khunto) mai to’o asina plataforma politika AMP ne’e liu hosi faze fundamentu respeita malu no hakarak politika diak ba Timor-Leste (TL).

Hateten Deputadu Fidelis, faze fundamentu politika diak ba TL maka respeitu no rona malu. Koalia ba malu ho laran nakloke maka to’o konkordansia asina plataforma politika AMP ne’e. Ba oin sei deskute ho komponentes hotu-hotu, entre AMP no partidus hotu-hotu para halo diak ba TL.

 

Iha fatin hanesan tuir Prezidente Bankada Khunto, Deputadu Luís Roberto da Silva argumenta, bankada CNRT, PLP no Khunto maioria ho 35 kadeira iha PN nu’udar opozisaun hamutuk kria unidu asina plataforma politika ne’e para hanoin ba futuru.

“Iha partidu politika, ita hotu hatene katak, iha ninia estruturalmente. Ninia programa atu hanoin ba futuru nasaun. Laos atu destroi. Maibé, kuda nafatin intrese nasional iha fuan para bele hametin nafatin paz no estabilidade iha ita rai laran,” katak Deputadu Luís.(Reportájem Mario Lobo)

PLATA FORMA POLITIKA

ALIANSA MAIORIA PARLAMENTAR

Konsidera eleisaun ne’ebé realiza iha loron 22 Fulan Jullu 2017, povu Timor-Leste (TL) espresa ho forma livre no demokratiku nia vontade hodi la fo ba partidu politiku sira ne’ebé konkore iha aktu eleitoral hodi hetan maioria absoluta iha Parlamentu Nasional.

Rejultadu ida ne’e hatudu katak atu forma guvernu ida ne’ebé metin (estavel) no representativ, presija servisu hamutuk entre partidu politika sira ne’ebé iha asentu parlamentar atu nune’e bele hamosu Aliansa Maioria Parlamentar (AMP) ida ne’ebé garante estabilidade governativa.

Rekoñese katak, servisu hamutuk ne’e rekere esforsu no sakrifisiu ne’ebé bo’ot husi partidu politiku sira hodi konverse (atu hamutuk) politika no programa ida-idak nian hodi nune’e bele integra iha planu komun ba guvernasaun ida ne’ebé fo impulse ba dezenvolvimentu no moris diak povu nian.

Hare’e ba situasaun atual, guvernu ida ne’e la ho apoiu maioria parlamentar sei hetan difikuldades hodi hamosu no implementa nia programa ho diak tamba karese forsa politika, nune’e em kausa dezenvolvimentu pais ida ne’e.

Tamba ne’e, partidu politiku sira ne’e la integra iha koligasaun guvernamental deside hamosu politika ida hodi promove moris diak ba povu no hametin estabilidade nasional.

Komprometidu hodi kontribui ba dezenvolvimentu pais ida ne’e nian liu husi afirmasaun iha Parlamentu Nasional hanesan sentru prinsipal ba diskusaun politika nasaun nian. Bankada parlamentar PLP, KHUNTO no CNRT hamosu plataforma politika ida ne’ebé define nia integra programa no politikas publikas ne’ebé rigorozu no abrangentes hodi mobiliza ita nia povu hola parte iha dezenvolvimentu nasional ho rekursus ne’ebé ita iha ho forma adekuadu no efisiente.

Prinsipiu No Vizaun :

Reafirma intensaun politika partidus politikus ne’ebé forma Aliansa Maioria Parlamentar (AMP) hodi servi povu no nasaun maka plataforma politika ida ne’e hatúr tuir prinsipius fundamentais konstituisaun RDTL ne’ebé konsagra ona iha artigu 1 to’o 15 hanesan, valores demokratikus, mosis diak povu nian, respeitu ba direitus humanus no promove respeitu ba leis no regras konstitusionais ne’ebé vigora iha nasaun ida ne’e.

Konsidera mos katak, Planu Estrategiku Dezenvolvimentu (PED) 2030 hatúr dezenvolvimentu humanu hanesan fator determinante ba hari’i nasaun Timor-Leste ida ne’ebé progresivu no justu maka plataforma ida ne’e hari’i bazeia ba plares dezenvolvimentu nian ne’ebé estabelese iha PED 2030 hanesan kapital sosial, infraestrutura bazikas, dezenvolvimentu ekonomiku no kuadru institusionais hodi lori Timor-Leste sai hanesan pais ida ne’ebé ho rendimentu mediu no a’as iha 2030 nune’e liberta povu husi kiak no mukit.

Objetivus :

Prisipál husi plataforma ne’e maka, lori povu Timor-Leste ba moris diak liu husi promove dezenvolvimentun ida ne’ebé fahe rekursu ho oportunidade hanesan atu alkansa objetivu ne’e maka iha tinan lima 2017/2022 sei adopta estratejias tuir mai ne’e :

  1. Kontinua hametin estabilidade, paz no seugaransa.
  2. Hadia diak liu povu nia moris liu husi investimentu publika ne’ebe liga liu ba kapasidade produs povu nian.
  3. Kontinua halao politika desentralizasaun hodi hakbesik governasaun ba povu atu responde nesesidades medidas povu nian iha area ruais no minisipius.
  4. Hametin sistema justisa hodi hamosu sistema justisa ida ne’ebe independente , efisiente no justu.
  5. Promove transparensia no estabilidade ba uzu kualker fundu estadu nian
  6. Kontinua implementa reforma fiscal.
  7. Preserva no haburas jestaun fundu petroliferu
  8. Kontinua promove setor privadu hodi ajuda estadu kria oportunidade de trabaillu
  9. Hadia faliprograma balu ne’ebe la kondus ho situasaun hatual pais nian.
  10. Promove dezenvolvimentu ida fahe rekusru ho oportunidade hanesan
  11. Hadia prestasun servisu ne’ebe diak ba povu.
  12. Promove edukasaun ida ne’ebe ho kualidade.
  13. Hadia kualiadade servisu saude nian
  14. Enkoraza nafatin dezenvolvimentu autio empregu, emprezas ki’I no mediu
  15. Promove programa asesu ba kreditu ne’ebe lalais no baratu.
  16. Promove nafatin rekonhesementu ba antigus kombatentes libertasaun nasional
  17. Kontinua fo protesaun ba labarik, feto, ferik katuas no difisiente sira
  18. Kontinua fo’o atensaun ba ojventude no promosaun igualidade
  19. Hametin no dezenvolve identidade kultura
  20. Hai’I ba kbit laek sira ho kualidade no mos hahu’u politika habitasaun rural no urbana.

Ho fiar katak, wainhira politika ne’e implementa maka sei iha mudansa signifikativu ba povu nia moris lor-loron, maka ami sira asina iha kraik ne’e reprezenta bankada parlamentar ne’ebé hamutuk ona Aliansa Maioria Parlamentar deklara aprova plataforma ne’ebé sai mata dalan ba dezenvolvimentu Timor-Leste nian iha tinan lima, 2017 to’o 2022.

Asinatura Deputadu :

Presidente Bankada CNRT, Deputadu Arão Noe de I. da C. Amaral

Presidente Bankada PLP, Deputadu Fidelis M. L. Magalhaes

Presidente Bankada KHUNTO, Deputadu Luis Da Silva

Vistu Husi:

Persidente CNRT, Kay Rala Xanana Gusmão

Presidente PLP, Taur Matan Ruak

Konselleiru Superior KHUNTO, José dos Santos Naimori Bucar

Dili, 12 Otobru 2017

Plataforma Politika AMP ne’e asina iha Salaun Ótel JL Vila Aimutin Comoro. Sasin ba asina Plataforma ne’e; membru, deputadu sira no militantes balun hosi Partidu CNRT, PLP no Khunto. (Reportájem Mario Lobo)

Leave a Reply

Your email address will not be published. Required fields are marked *