Hamosu Rumoris Konflitu, Folin Fós Sa’e Iha Lautém

MEDIAONETIMOR-Tanba ema deskoñesidu lansa rumoris konflitu apresiasaun Programa VII Governu Konstitusionál ne’ebé lao dau-daun ne’e maka fo influensia ba nesesidade baziku hanesan fós nia folin sae ba folin entre U$25.00 to’o U$30.00.

“Hau simu telefone hosi Lospalos dehan ema balun kumesa lansa isu hatauk povu iha ne’eba. No derepente sasan nesesidade bazika nia folin mos sa’e. Hanesan fós hosi U$15.00 sa’e ba U$25.00 to’o U$30.00. Ne’e prekupasaun ita nia povu.”

Lia fuan hirak ne’e levanta hosi Deputada Maria Ana Belo Sávio hosi Bankada Fretilin iha nia ponto de órdem iha sesaun dader nian antes atu hahu halo intervensaun ba apresisasaun Programa VII Governu Konstituisionál ba loron datoluk, (Kuarta, 18/10/2017) iha uma fukun Parlamentu Nasionál (PN).

Hosi isu falsu ne’ebé fo impaktu ba povu nia moris ne’e Deputada Ana Belo, husu ba governu para hato’o mensajem ruma ba povu para bele hakmatek iha sira nia hela fatin. Povu mós labele fiar ba rumoris sira.

Aliende ne’e Deputada Ana Belo mós apela ba povu iha munisipiu hotu-hotu hodi dehan, “Ami iha ne’e situasaun normál. Laiha problema. Ami deputadu nain 65 iha ne’e unidade hodi luta ba imi povu nia futuru liu hosi programa VII Governu.”

Deputada Ana Belo hatutan, husu ba povu Timor-Leste tomak atu tu’ur hakmatek iha idak-idak nia fatin para akompaña programa ne’ebé levanta no deskute dau-daun iha uma fukun PN ba imi povu no hotu-hotu nia futuru.

Lia fuan hanesan mós hato’o hosi Deputada Albina Marçal Fréitas hosi Bankada Partidu CNRT. Deputada Albina duvida ho folin fós ne’ebé sae ne’e hodi prekupa ho ninia stok.

“Hau prekupa ho fós ninia stok maka ema lafa’an ka halo nusa. Tanba ne’e maka ami husu ba ministeriu relevante para atu haré ita nia povu nia prekupasaun ne’e hó lalais hodi atende sira nia nesesidade,” sujere Deputada Albina iha nia ponto de órdem.(Reportájem Suzana Cardoso)

Leave a Reply

Your email address will not be published. Required fields are marked *