Somotxo: ”VII Governu Monu Sei Mantein Ho Governu Jestaun”

MEDIAONETIMOR-Ministru Defesa no Seguransa VII Governu Konstituisionál, José Agostinho Somotxo hateten, bainhira VII Governu Konstituisionál monu maka tenki hakat ba eleisaun antisipada.

“Nune’e, ami iha VII Governu Konstituisionál sei mantein nafatin hanesan Governu Jestaun para atu organiza eleisaun antisipada to’o fali governu foun mai,” hatan Somotxo ba jornalista hafoin remata enkontru ho Prezidente Repúblika, Francisco Guterres Lu-Olo iha Palásiu Prezidente Nicolau Lobato, Kuarta, (18/10/2017).

Nia hatutan, VII Governu Konstitusionál monu tenki lao ho governu jestaun hanesan iha nasaun hotu-hotu kuandu governu monu kerdizer ke tenki iha eleisaun antisipada. Entaum governu ne’e tenki kontinua para jere.

Katak Somotxo, dau-daun ne’e hotu-hotu akompañia debate Programa VII Governu Konstitusionál nian ne’ebé maka deputadu sira deskute hela iha Parlamentu Nasional (PN) ne’ebé hahu hosi loron 16 to’o 20 Outobru 2017 no tama ona ba loron datoluk. Falta loron rua deit ona. Hotu-hotu bele nota katak passa ka la-passa.

“Karik Programa VII Governu Konstitusionál nian la-pasa ka governu ne’e monu, maka sei iha Governu Jestaun para atu organiza eleisaun antisipada to’o fali governu foun mai,” tenik Somotxo.

                                                                                      Fretilin Fiar A’an

Iha parte seluk Estudante Universidade Nasional Timor Lorosa’e (UNTL) iha Fakuldade Sosiál Politika (Faspol), Adelaida Marçal Fernandes hateten, kuandu akontese eleisaun antisipada Fretilin fiar a’an sei manan nafatin.

“Hosi observasaun debate iha PN ba apresiasaun programa VII Governu Konstituisionál Fretilin no Partidu Demokratiku (PD) fiar katak sei la-passa. Tanba oposisaun sira forma ona Aliansa Maioria Parlamentár (AMP). Nune’e, debate ne’e hanesan parte ida atu hatudu ba públiku konaba kapasidade VII Governu ne’e nian,” hateten Adelaida ba jornalista iha UNTL.

Nia hatutan, hosi programa VII Governu Konstituisionál ne’ebe aprezenta hatudu ona kapasidade no kbi’it atu kaer ukun maske ho minoria. Fretilin fiar a’an katak ho deit PD sira bele halo ona mudansa. Exemplu hatudu ona hosi Rejiaun Espesial Oe-Cusse.

“Nune’e hosi povu sei fiar nafatin ba Fretilin kuandu iha eleisaun antisipada, satan ho aprezentasaun programa ne’ebé maka aprezenta ne’e aumenta liutan povu nia fiar ba Fretilin atu manantan votus iha eleisaun antisipada. Tanba ne’e tenki tetu didiak antes atu hakat ba eleisaun antisipada,” sujere Adelaida.(Reportájem Deonisio da Cruz/Suzana Cardoso)

Leave a Reply

Your email address will not be published. Required fields are marked *