Lere:“Lider To’o Povu Halo Krime Toma Medida Todan”

MEDIAONETIMOR-Evita konflitu rejeisaun Pograma VII Governu Konstituisionál iha Parlamentu Nasionál (PN), Falintil-Forsa Devesa Timor-Leste (F-FDTL) no Polisia Nasionál Timor-Leste (PNTL) sei tomada medida todan ba sira ne’ebé involve a’an iha krime tantu lider sira to’o povu bain-bain.

“Kuandu haruka ami nia soldadu hamrik iha seguransa ne’eba la hare ba oin. Tantu deputadu ka ministru. Maibé hare ba krime ne’ebé maka komete. Hó ida ne’e maka ami apela ba joven hotu-hotu no ba komunidade tomak atu hakmatek iha imi nia fatin.”

Apela Major Jeneral, Lere Anan Timur ne’ebé akompaña hosi Komandante Jeral PNTL, Julio da Costa Hornay ba povu TL liu hosi komferensia imprensa konaba amiasa malu ne’ebé akontese iha uma fukun Parlamentu Nasionál (PN) hafoin remata debate programa VII Governu Konstitusionál ne’ebé hetan rejeisaun.

Nia esplika, iha vida demokratiku maka hanesan deputadu sira halo debate durante loron 4 iha uma fukun PN hodi deskute konaba destinu nasaun no povu nian. Maibé la-bele ulptrapasa demokrasia ninia limitasaun.

Tanba katak Lere, kuandu ultrapasa ona demokrasia ne’e anarkizmu ne’ebé sei fo impaktu ba halo povu tauk. Maka apela ba hotu-hotu atu tu’ur hakmatek iha idak-ida nia fatin. Hala’o aktividade loron-loron hanesan bain-bain.

Lere dehan, se’e maka tós nain halo nia tós. Se’e maka karau atan ho bibi atan, hein karau ho bibi. Se’e maka halo negosiu kontinua halo negosiu. Parte politiku maka haré kona-ba politika. No forsas armadas ho polisia iha para tau matan ba imi hotu-hotu.

“Ami nu’udar elementu ne’ebe garante seguransa no estabilidade nomos kaer lei ho ordem apela ba hotu-hotu atu tu’ur hakmatek. Tantu bo’ot ka ki’ik. Lider ka la-lider, lakohi para estraga situasaun ne’e. Se maka provoka situasaun forsas armadas ho PNTL sei toma medida todan,” tenik Lere hodi hatutan.

Prezidente Repúblika nu’udar Komandante Supremu das Forsas Armadas fo ona kompetensia tomak ba F-FDTL ho PNTL atu atua iha kualker momentu kuandu simu órdem hosi komandu. Nu’udar aparellu estadu la hakiduk ba kualker tempu.

“Sese deit, tantu lider, ministru, joven no povu bain-bain maka komete krime, apartir ohin ba oin forsas armadas ho polisia sei toma medida ne’ebe ke todan. Nune’e maka diak liu idak-idak hala’o nia aktividade loron-loron nian hanesan bain-bain,” haktuir Major Jeneral F-FDTL ne’e. (Reportájem Deonisio da Cruz)

Leave a Reply

Your email address will not be published. Required fields are marked *