Xanana: “Governu Monu Ne’e Problema Konstituisaun”

MEDIAONETIMOR-Oinsa ita nia mensajem ba paz no estabilidade iha ita nia rai Timor-Leste (TL)? Hatan Sefi delegasaun Fronteira Maritima, Kay Rala Xanana Gusmão hodi dehan, “Buat paz no estabilidade ne’e oin seluk. Katak ita la-oho malu. La-sunu uma arbiru. Ida ne’e maka ita husu nafatin atu povu TL moris iha paz no estabilidade.”

Xanana hatan lia fuan ne’e iha nia vizita ofisial ba Portugal foin lalais ne’e. Nia hateten, durante vizita iha liur, laiha internet. Laiha buat ida. Maibé tuir informasaun ne’ebé hato’o hosi maluk sira iha Portugal katak iha TL kumesa ameasa malu.

Nune’e Xanana hatan hodi esplika, lidera nasaun frazil laos atu hanorin maibé atu aprende. Tanba ita mós sei frazil.

Katak Xanana, paz no estabilidade maka moris iha harmonia no hadomi malu. Idak-idak halo nia servisu no aktividade tuir idak-idak nia responsabilidade hodi kontribui ba paz no estabilidade. Ida ne’e maka paz. No ida ne’e maka estabilidade.

Tenik Xanana hodi hatutan, “Se’e governu monu ka governu sa’e, ne’e laos problema paz no estabilidade nian. Ida ne’e problema konstituisaun ninian. Ida ne’e problema demokrasia ninian.”

                                                                        Toleransia Entre Povu

Iha parte seluk hatan ba GMN TV Xanana apela ba povu tomak atu hakmatek hodi hametin paz no establidade. “Ita hotu tenki hatudu nafatin maturidade politika hodi hametin nafatin paz no estabilidade nomos toleransia entre povu.

Hatutan Xanana, politika bele Politika. Maibé importante maka povu ida ne’e; hare malu, hadomi malu, koalia ba malu, hanorin malu no koalia ho joven sira para hametin fiar. Katak saida deit maka akontese iha politika buat sira ne’e hanesan lisaun aprendeziazaun.

Tanba apela Xanana, futuru ne’e partense ba futuru jerasoens. Maka, husu ba hotu-hotu kaer liman ba malu garante estabilidade paz iha TL. “Iha naseons hotu-hotu kuandu ita temi politika laos buat ida atu bahasa dehan lunch karik lae. Laos fasil,” tenik Xanana.(Nitizen jurnalizm/GMN TV)

 

Leave a Reply

Your email address will not be published. Required fields are marked *