Debate Daruak Programa VII Governu, Rejimentu Ejiji Deskursu Abertura Tenke PM

MEDIAONETIMOR-Debate daruak programa VII Governu Konstituisionál ne’ebé reformula ona iha Konsellu Ministru, hosi Governu reprezenta deit ministru. Maibé tuir rejimentu eziji katak, deskursu abertura ne’e tenke aprezenta hosi Primeiru Ministru (PM).

Prezidente Bankada Conselhu Nasional Reconstrusaun Timorense (CNRT), Deputadu Arão Noe Amaral lia tu’un ba jornalista iha uma fukun Parlamentu Nasionál (PN), Kuarta, (25/10/2017) dehan, “Governu sei haruka ekipa ida ne’ebé delega hodi naran PM maka mai. Ba ami la-problema. Maibé, rejimentu mak ejiji katak deskursu abertura aprezentasaun programa ne’e tenki hosi PM.”

Deputadu Arão esplika, konstituisaun hateten programa governu primeiru rezeita. Governu sei iha kna’ar lori fali segundu programa mai iha PN. Maibé, opsaun governu nian katak PM lakohi mai. No haruka ekipa ida ne’ebé delega hodi naran PM mai ne’e ba ami la problema.

Maibé haktuir Arão, rejimentu mak ejije katak deskursu abertura aprezentasaun programa ne’e tenke aprezenta hosi PM. Ne’e rejimentu mak hateten. Bainhira Governu intrepreta bele delega, depois maka hare fila fali.

“Asuntu mais importante mak governu tenke kumpri lori programa mai aprejenta antes loron 30 tuir kontituisaun haruka,” dehan Deputadu hosi CNRT tinan 10 ona ne’e.

Iha sorin seluk Prezidente Bankada Partidu Klibur Haburas Unidade Nasional Timor-oan (Khunto), Deputadu Luís Roberto da Silva sujere atu diak liu PM Marí Bin Amude Alkatiri maka mai aprezenta.

“Debate programa VII Governu daruak nian delega fali ba membru governu balun maka atu aprezenta, ne’e la bazeia ona ba konstituisaun haruka. Nune’e diak liu maka PM Marí maka mai diretamente hodi esplika klaru,” katak Deputadu Luís.

                                                               Ministru Ida Mak Reprezenta

Iha fatin seluk remata enkontru Konsellu Ministru, Secretariu Estadu Konsellu Ministru no Komunikasaun Sosial, Matias Freitas Boavida hateten, maske seidauk iha desijaun final maibé ministru ida mak sei reprezenta PM Marí atu ba aprezenta programa VII Governu daruak nian.

“Tanba prekupasaun, iha situasaun sira ne’ebé la admite atu ba, ministru ida bele reprezenta PM hodi ba aprejenta programa governu iha PN. Hau hatene deputadu sira mós iha fuan atu kumpriende situasaun ne’e,” tenik Matias.(Reportájem Aderito Ximenes)

Leave a Reply

Your email address will not be published. Required fields are marked *