Hein To’o Kole, Xanana Seidauk To’o Dili

MEDIAONETIMOR-Sefi delegasaun Prinsipál Desputa Fronteira Tasi Timor, Kay Rala Xanana Gusmão ne’ebé tuir planu sei to’o fila fali iha Aeroportu Nicolao Lobato Dili iha loron, Kuarta, (25/10/2017) maibé la-konsege mosu, maske hein to’o kole.

Tuir observasaun Media ONE Timor (MOT) nota katak, membru Falintil-Forsa Deveza Timor-Leste (F-FDTL) no membru Polisia Nasionál Timor-Leste (PNTL) fó seguransa ho armas kompletu hahu hosi rotunda Comoro to’o aeroportu Prezidente Nicolao Lobato.

Entertantu iha salaun VIP, maizu menus tuku 11:30 ÓTL Ministru Defeza no Seguransa, José Agostinho Sequeira Somotxo no….Euclides Belo hamutuk ho jornalista sira hein ona iha salaun VIP to’o aviaun Citilink tu’un iha aeroportu.

Tanba antes ne’e fo avisu ona katak heroi Timor-Leste, Xanana sei mai hosi Aeroportu Denpasar ho aviaun Citilink to’o Dili maizu menus tuku 12:00 OTL, maka maske aviaun seidauk para hó diak jornalista sira rame-rame haklili kamera halai hodi hein besik eskada aviaun nian.

Parte F-FDTL no PNTL hamrík firmi hosi ninin-ninin. Lao hosi parte oin Euclides Belo hetan akompaña hosi eskoltu Ministru Defeza no Seguransa hosi kotuk hakat hakbesik ba aviaun Citilink. No Ministru Devesa no Seguransa, Somotxo hein iha salaun VIP.

Tantu jornalista, Euclides Belo no eskoltu Ministru Defeza no Seguransa kakorok kleuk ba-mai hodi hateke firmi ba odamatan aviaun nian. Maibé, hateke to’o matan kolen, sai hosi odamatan aviaun pasajeirus sira ne’ebé maioria ema Xineza maka sai idak-idak to’o hotu.

La to’o ba ne’e deit, esperansa para hein nafatin luta nain Xanana sei kontinua tanba iha tuku 13:00 OTL aviaun Sriwijaya tu’un tan. Hateke ba hateke mosu hosi odamatan so deit pasajeirus sira. Hein ba hein la-mosu hosi aviaun ibun. Hotu-hotu fila ho liman mamuk.

Iha parte seluk tuir informasaun hosi fontes konfirmadu hateten, Xanana hafoin fila hosi Portugal sei hela iha Bali, Indonezia hodi halo enkontru ho pesoal importante balun. No seidauk hatene órariu Eis Primeiru Ministru ne’e bainhira maka sei to’o iha Timor-Leste.

“Fila ona. Tanba laiha tan aviaun ida maka atu tama maitan,” hateten ida hosi membru PNTL ba jornalista sira ne’ebé maka fihir ba-mai iha dalan VIP ba kampu aviaun Sriwijaya ne’ebé maka pasajeirus sira kumesa lao ba sae daun-daun ona.(Reportájem José Samuel/Dulce Ximenes)

Leave a Reply

Your email address will not be published. Required fields are marked *