Sidadaun Timoroan Forma Iha Estrada, Embaixada Portugal Atende La-dignu

MEDIAONETIMOR-Tamba sidadaun timoroan ne’ebé trata dokumentus laiha espasu hodi forma deit iha estrada ninin ho loron manas maka reprezentante povu iha uma fukun Parlamentu Nasionál (PN) konsidera edifisiu embaixador Portugal foun iha Palasiu Governu nia sorin karuk la-dignu.

“Sidadaun Timor ne’ebé mak lor-loron trata dokumentu iha Embaixada Portugal nia oin forma deit iha Estrada ninin ho loron manas ne’ebé mak ita hare’e didiak ladun iha tratamentu dignu ba Timoroan hirak ne’e.”

Lia hirak ne’e hato’o husi Deputadu Bankada Partidu Libertasaun Popular (PLP), Maricio Juvinal iha plenaria, Segunda, (30/10/2017).

Nia hateten, laiha tratamentu dignu ba sidadun Timoroan sira ne’ebé maka hakarak trata dokumentu. Sira laiha espasu. Timoroan hirak ne’e forma deit iha estrada ninin. Agora tempu bailoron. Loron manas lós, sira hamrik deit iha estrada.

No tempu diferente hanesan udan tu’un hatutan Deputadu Mericio, bele imajina ona sira ne’ebé trata dokumentus iha Embaixada Portugal ne’e atu hamrik tan iha ne’ebé. Nune’e, husu ba Ministeriu Negosiu Estranjeiru no Kooperasaun (MNEK) atu tau atensaun.

Deputadu Mericio mós fo hanoin para MNEK komunika no kolabora ho Embaixada Portugal atu hahu halo kondisaun ruma atu nune’e sidadun sira ne’ebé trata dokumentu ne’e iha espasu no iha dignidade.

Hatan preokupasaun Deputadu Mericio nian ne’e, Ministru Presidensia Consellu Ministru (MPCM), Adriano Nacimento hateten, sei ko’ordena para informa ba Embaxador Portugal hodi tau atensaun.

“Lós duni ita nia juventude barak mak iha hanoin no hakarak hodi halo visa no pasporte iha Embaixada Portugal. Maibé laiha kondisaun diak ba sira. Ami sei hatutan ida ne’e ba ministeriu kompetente hodi kontinua hato’o ba embaixada refere,” tenik Adriano.(Reportájem Aderito Ximenes)

Leave a Reply

Your email address will not be published. Required fields are marked *