Manutensaun Ró Patrulla Hosi Australia, Lere: “Governu Ne’e Bainhira Maka Estabil”

MEDIAONETIMOR-Atu kontrola ikan ne’ebé maka bain-bain ema naok iha Tasi Mane Timor-Leste (TL) nian maka iha tempu badak nasaun viziñu Australia sei oferese ró patrulla rua ne’ebé presiza nia manutensaun durante tinan naruk nia laran.

“Australia sei fo duni ró rua ne’e mai TL para lori kontrola ikan sira ne’ebé maka iha tasi mane atu ema labele naok tan ita nia ikan iha tasi refere. No depois maka manutensaun durante tinan naruk nia laran.”

Lia fuan hirak ne’e hato’o hosi Primeiru Ministru VII Governu Konstituisionál, Marí Bin Amude Alkatiri ba jornalista iha konferensia imprensa ne’ebé hala’o iha Aeroportu Prezidente Nicolao Lobato hafoin fila hosi konferensia Australia, Segunda, (06/11/2017).

Nia esplika, ró patrolla ne’ebé maka atu intrega falta deit atu asina iha Nova Yorke. Remata hosi ne’eba sei marka data para intrega tanba hosi konsulta malu ró rua ne’e, TL konkorda simu tanba nesesidade urjente ba kontrola riku soin tasi mane nian.

Antes Australia intrega ró ne’e, PM Marí hatutan, iha semana ne’e nia laran sira sei fo uluk ró segundo mão no balun sei mai fo treinamentu ba Mariña no pilotu iha komponente Naval Falintil – Forsa Defesa Timor-Leste (F-FDTL) ne’ebé maka atu kaer ró foun ne’e.

“Aban hau sei haruka konvite ba ministru kompetente, Ministru Finansas hamutuk ho delegasaun tékniku F-FDTL ba haré kondisaun ró ne’ebé mak atu mai costa sul ne’e presiza iha baze de apoio,” tenik PM Marí.

Iha Fatin hanesan Maijor General Lere Annan Timor hateten, nia duvida ho ró ne’ebé Australia sei oferese mai TL.

“Ita agradese ba Guvernu Australia oferese ona ró mai ita. Hau laos politiku. Mais atu dehan, hau la kohi depende demais ba ema. Kada ró lori tinan ida mak prontu. Entaun ró 2 ne’e bele han tempu to’o tinan 10, tinan 5 ou tinan 6 nia laran,” tenik Lere.

Maibé oinsa hó rekursu umanu F-FDTL nian. Lere hatan hodi dehan, “Ita iha ema atu kaer ró ne’e. La iha problema. Maibé manutensaun altu ne’e maka la bele. Ba sira ki’ik ne’e bele. Aliende ne’e fatin maka problema. No la hatene Guvernu ne’e bainhira maka estabil para haré kestaun hirak ne’e,” katak Lere.

“Uluk kedas ita atu simu ró rua ne’ebé maka Australia fo mai ita impresta. Maibé iha tempu ne’eba Eis Primeiru Ministru, Kay Rala Xanana Gusmão seidauk hakarak tanba ita sei deskuti hela ho problema Fronteira Marítima,” dehan PM VII Governu ne’e.(Reportájem Mario Lobo/Jose Samuel)

Leave a Reply

Your email address will not be published. Required fields are marked *