Hetan Espetativa Iha Facebook, PD Firme Hó Fretilin

MEDIAONETIMOR-Maske hetan espetativa oin-oin hosi ema hotu-hotu liu hosi mídia no situs sosiais, Facebook maibé Partidu Demokratiku (PD) nafatin firme hó Partidu Fretilin hodi servi timor-oan.

“Iha PD laiha kubu rua ka kubu tolu. Biar ema hotu-hotu bele koalia iha Facebook, mídia ka iha ne’ebé deit ho ida-idak ninia espetativa. Ho ida-idak nia hanoin konaba PD. Maibé PD nafatin ho nia posisaun ba o maubere-oan, PD prontu servi.”

Lia fuan hirak ne’e hato’o hosi Prezidente PD, Mariano Assanami Sabino ba Jornalista hafoin remata reuniaun alargadu PD nian hodi konsolida partidu atu haburas no hametin demokrasia iha Timor-Leste (TL) foin lalais ne’e iha Salaun Canosiana Becora.

Nia esplika, PD afirma forte ho firme atu kontinua lao hamutuk ho Fretilin iha VII Governu Konstituisionál. Nune’e, alerta nafatin ba povu tomak no inan-aman sira katak, PD imi nia oan. Partidu ida ne’e harí hanesan hatutan heroi sira nia mehi no hakarak ba sira nia luta atu konstrui ba estadu direitu demokratiku.

Haktuir Assanami, PD metin ho prinsipiu atu konstrui estadu direitu demokratiku. Firme lao nafatin ba oin aposta ba interese nasional. Liu-liu husu ba Prezidente Repúblika kontinua promulga dialogu atu hotu-hotu tenki ba dialogu ho honestu. Ho laran ba interese rai no nasaun ida ne’e.

Maske hetan deit kadeira 7 hatutan Assanami, PD prontu atu servi. Tanba ne’e laiha inkondisaun ba estabilidade. Laiha inkonstituisaun ba governu ne’ebé maka atu lao diak para bele servi durante tinan lima.

Assanami hateten, durante tinan lima ba oin hamutuk ho Fretilin iha VII Governu Konstitusionál PD sei servi ho lealidade no loyalidade ba povu doben TL tuir dutrina luta ne’ebé funu nain sira husik hela tiha ba hotu-hotu.(Reportájem Deonisio da Cruz)

Leave a Reply

Your email address will not be published. Required fields are marked *