Orsamentu Ratifikativu La-Aprova, PR Lú Olo: ”Fo Fiar Ba Povu Hetan Governu Ida Diak”

MEDIAONETIMOR-Maske VII Governu Konstituisionál nia tempu hodi aprezenta programa daruak nian to’o ona loron 30, maibé aprezenta fila-fali orsamentu ratifikativu ne’ebé la hetan aprovasaun hosi Parlamentu Nasionál (PN).

Tuir Prezidente Repúblika (PR), Francisco Guterres Lú Olo ba jornalista hafoin remata loke seminariu nasionál iha Kuartel Jerál Falintil-Forsa Deveza Timor-Leste (F-FDTL) konaba Direitus Humanus no F-FDTL nia misaun hateten, ne’e servisu parte PN sira nian.

“Ita hotu mesak timor-oan. Sei buka dalan, túr hamutuk hodi koalia para ultra pasa situasaun hirak ne’e. Hodi fo fiar ba ita nia povu para hetan Governu no Parlamentu ida ne’ebé funsiona ho diak, para bele fo konfiansa diak ba ita nia povu,” dehan PR Lú Olo.

Katak PR Lú Olo, sei iha dalan para atu resolve situasaun politika ne’ebé maka akontese dadaun ne’e. Nune’e, iha tempu besik sei fo sai rezultadu enkontru ho lider nasionál sira, inklui karta hosi Prezidente Partidu CNRT, Kay Rala Xanana Gusmão nian.

Hatan jornalista konaba Bankada Bloku Aliansa Maioria Parlamentar (AMP) resposta orsamentu ratifikativu VII Governu nian ho mosaun sensura katak PR Lú Olo, ne’e parte servisu PN sira nian.

                                                OR Laos Prioridade

Tanba Orsamentu Jerál Estadu tinan 2017 nian besik remata ona maka tuir Prezidente Bankada Congresu Nasional Timorense (CNRT), Deputadu Arão Noe iha nia intervensaun katak Orsamentu Ratifikativu (OR) laos prioridade atu deskute.

“Tuir lolos ita prekupa halo OJE tinan 2018 nian hodi resolve situasaun estadu nian tomak,” hateten Deputadu Arão hodi rezeita OR VII Governu nian ne’ebé debate iha PN, Segunda, (20/11/2017).

Nia hateten, OR mós importante. Maibé orsamentu estadu para resolve situasaun estadu tomak. Laos hodi selu dividas deit. Tanba falta deit fulan ida remata OJE tinan 2017.

“Ami nia preokupasaun mak depois de dois deximu iha Janeiru ho Fevereiru estadu atu moris ho saida, kuandu OJE 2018 hosi governu seidauk elobaro hodi deskuti. Lahatene bainhira maka bele aprova. Durante tinan 2018 Estadu sei la moris deit hó OR,” katak Deputadu Arão.

Dehan Arão, BAMP preokupa liu atu fokus ba OJE 2018. Tuir prosesu normál lei jestaun finanseiru nian, governu tenke aprezenta ona Lei OJE ba tinan 2018 iha loron, 15 Outobru 2017 hodi resolve kontiunidade funsionamentu estadu nian.(Reportájem Deonisio da Cruz/Aderito Ximenes)

Leave a Reply

Your email address will not be published. Required fields are marked *