BAMP Preokupa Hó OJE Tinan 2018, OR Karakter Urijenti Selu Dividas La-passa

MEDIAONETIMOR-Tanba Bloku Aliansa Maioria Parlamentár (BAMP) preokupa liu hó Orsamentu Jerál Estadu (OJE) tinan 2018 nia prazu atu debate liu tiha ona maka Orsamentu Ratifikativu (OR) ho karakter urijenti para selu dividas hosi VII Governu Konstituisionál la-passa.

“Orsamentu ne’e importante atu selu dividas sira ne’ebé governu anterior rai hela ba governu foun. Hanesan; selu hospital Siloan U$6 millions, selu fajiadu ba dividas Timor Telecom (TT) U$8 millions.”

Hateten Deputada Bankada Frenti Revolusionariu Timor-Leste Independente (Fretilin), Maria Anjelica iha plenaria deskusaun Urijensia ba OR iha uma fukun Parlamentu Nasionál foin lalais ne’e ne’ebé la-passa ho votus afavor 30 no kontra 35 hosi 65 deputadu.

Aliende selu devidas dehan Deputada Maria Anjelica, Komisaun C Parlamentár simu karta hosi Primeiru Ministru (PM) VII Governu, OR ne’e atu uza ba selu kompañia sira ne’ebé fo apoiu Timor-Leste halo negosiasaun mina maka hanesan Arian Fox.

Nune’e, deskusaun ba pedidu OR ho karakter urijensia husi VII Governu ne’e tuir Deputada Maria Anjelica, orijente tebes atu responde nesesidade povu no estadu. Maibé iha prosesu deskusaun hetan kontra makas hosi BAMP.

Tuir Lolos Halo OJE Tinan 2018

Iha fatin hanesan ida hosi Deputadu BAMP Prezidente Bankada Congressu Nasional Timorense (CNRT), Arão Noe iha plenaria Parlamentu Nasionál (PN) hateten, OR hosi VII Governu ne’e importante.

Maibé hatutan Deputadu Arão, iha Fulan Novembru ne’e tama ona ba fim do ano 2017 nian. Ne’ebé Orsamentu Jeral Estadu (OJE) 2017 besik hotu ona. Tuir lolos PN preokupa halo OJE tinan 2018 hodi resolve situasaun estadu ninian tomak.

“Orsamentu ba estadu laos atu selu dividas deit. Dividas ne’ebé iha bele inklui iha OJE 2018. Tamba ita agora falta fulan ida deit atu tama ba OJE 2018 nian ona,” dehan Deputadu Arão hodi responde deputadu governasaun Fretilin ninian katak OR para selu dividas iha hospital, Kompaña balun no TT.

Nia saliente, BAMP nia preokupasaun fundamental maka depois de duo-decimo iha Janeiru hó Fevereiru tinan 2018 estadu atu moris ho saida, kuandu kumesa agora orsamentu 2018 seidauk elabora hodi deskuti. OR atu resolve situasaun agora. Maibé oinsa ho durante tinan 2018 nian.

Tuir Deputadu Arão, prosesu normal lei jestaun finanseiru Governu nian iha loron 15 Outobru 2017 liu ba, Governu tenki aprezenta ona lei OJE ba tinan 2018 para bele rejolve kontiunidade funsionamentu Estadu nian.

“Ne’e mak ami dehan OR ne’e ita bele kansela para governu hare OJE 2018. Programa hirak ne’ebé preokupa iha OR bele diskreve selu ho OJE 2018. Ita bele rejolve. Laos rejolve dividas ka komprimisius deit. Mai ita rejolve estadu nia funsionamentu tomak,” dehan Deputadu Arão.

Tamba katak Deputadu Arão, tinan 2018 ba oin funsionariu sira tenke simu osan. F-FDTL, PNTL, veteranus, ter seira idade, bolsa da mãe, sira ne’e tenke simu osan. Entaun BAMP preokupa atu rejolve estadu nia objetivu tinan tomak.

“OR laos ona preoridade atu deskuti. Tamba ita iha ona fim de Novembro. Falta fulan ida deit ita nia OJE 2017 atu remata. 2018 nian OJE seidauk iha. No seidauk elebora no aprejenta mai PN to’o bainhira mak ita bele aprova OJE,” husu Deputadu Arão.(Reprotajem Aderito Ximenes)

Jestaun Financas Duo-Decimo

Redasaun: Hanesan públika tiha ona iha situs sosiais Facebook Bloku AMP nian hodi esplika kona Jestaun Financas Duo-Decimo nian ne’e importante tanba notisia Media ONE Timor nian ne’e mós temi konaba ne’e maka redasaun públika hikas fila fali ba le’e nain sira para kumpriende diak liutan.

Iha Jestaun Financas Publica Timor-Leste nian, aplica regime duo-decimo nudar meus transição ida. Regime Orçamento duo-décimo nee aplika wainhira Orçamento Geral Estado ba Tinan Financeiro ida seidauk aprova.

Objectivo aplicação orçamento duo-décimo maka atu asegura katak funcionamento mácina estado continua lao.

Nunee formula ba orcamento duo-décimo ba kada instituição maka “total orcamento/12”. “Total orcamento” bele mai mai husi kategoria orcamento tomak, maka hanesan kategoria “Salario no Vencimento, Bens no Serviço, Transferência Publika, Capital Menor, no Kapital Dezenvolvimento”. Tamba objectivo orcamento duo-décimo nee atu asegura deit funcionamento makina estado, nunee Iha prática normalmente hasai kategoria Kapital Dezenvolvimentu husi total orcamento.

Ho orcamento duo-décimo, instituição publiku ida Iha fulan ida só bele gasta deit 1/12 husi nia total orcamento husi OJE tinan liu ba. Ezemplu: instituição “A” Iha $12 molhoens husi OJE 2017 nian, ba fulan Janeiro 2018, instituição nee só bele gasta deit maximu $1 miliaun. Orcamento duo-décimo normalmente aplika deit ba fulan ida to’o rua (Janeiro-Fevereiro)

Ba ita nia situação agora, orcamento duo-decimo bele aplika iha tinan oin. Kuandu Orcamento Rectificativo maka la aprova no too fulan Janeiro tinan oin seidauk Iha OJE 2018, orcamento duo-décimo bele aplika maibe aplika tuir Organica VI Governu nian, labele aplika bazeia ba Organica VII nian.

Nunee husu ba povo tomak, funcionários, membros F-FDTL no PNTL, veteranos no antigos combatantes, ferik no katoas (idosos) no entidades tomak atu lalika laran tauk wainhira Orcamento Rectificativo “la aprova” tamba sei Iha orcamento duo-décimo nebe aplika tuir Organica VI Governu nian – nunee makina estado continua funciona.(Reportájem Facebook Bloku AMP)

Leave a Reply

Your email address will not be published. Required fields are marked *