Somotxo:”Hau Moe Ho Situasaun Politika”, Lere: “Forsa 300 Fo Seguransa 28 Novembru”

MEDIAONETIMOR– Maske Timoroan hatudu ona sira nia maturidade politika hodi hakmatek iha idak-idak nia hela fatin, maibé situasaun krizi politika iha nivel lider sira aumenta manas ba beik-beik, halo Ministru Defeze no Seguransa, José Agostinho Sequeira Somotxo ne’ebé mós mai hosi veteranu senti moe.

“Hanesan veteranu e agora Ministru Defeza no Seguransa, hau moe ba situasaun politika ida ne’e. No hanesan mafia politika iha rai ida ne’e. Ne’ebé aban bain rua hau la mate ho kilat musan, maibé hau sei mate ho moe.”

Hateten Ministru Defeza no Seguransa, José Agostinho Sequeira Somotxo ba Jornalista hafoin remata sorumutu ho Prezidente Repúblika, Francisco Guterres Lú Olo iha Palasiu Presidensial, Tersa, (22/11/2017).

Somotxo esplika liutan, situasaun politika atu lao hó diak hotu-hotu tenki kontribui para labele ona iha tan lalin ita nia sasan foer sira ne’e tun-saé. Maske tensaun politika a’as ba beik-beik maibé intrega hotu ba orgaun soberania Parlamentu atu deside.

Nune’e maka Somotxo apela nafatin ba timor-oan; joven, veteranus to’o politiku sira, hotu-hotu kontribui ba situasaun atu lao hakmatek. Bainhira problema ruma mosu hanesan hana malu, tuda malu ka baku malu ordem sai hosi Komandu F-FDTL no PNTL maka ba halo interven.

“Hanesan Ministru Defeza no Seguransa, hau apela ba joven sira, populasaun tomak, Veteranus sira no ba Politiku tomak para hotu-hotu kontribui ba situsaun ne’e atu lao diak. Ita hotu lakohi ona atu lori ita nia sasan foer sira ne’e tun-saé,” apela Somotxo.

Asegura Selebrasaun 28 Novembru

Iha parte seluk Chefe Estadu Maior Falintil Forsa Defeza Timor-Leste (F-FDTL), Major Jeneral Lere Anan Timur hafoin remata sorumutu ho Prezidente Repúblika (PR) Francisco Guterres Lú Olo ba jornalista hateten, forsa 300 komesa movimentu ona iha Munisipiu Covalima.

“Forsa 300 komesa movimenta ona iha Munisipiu Suai hodi fo seguransa ba loron 28 Novembru hanesan loron independensia Unilateral TL nian. Aliende sei ba halo Guarda de Ondra da Parada Militar, balun hosi membru F-FDTL 300 ne’e sei fo seguransa ba serimonia ne’e tomak,” tenik Lere.

Hatan situasaun seguransa rai laran Lere dehan, em jeral situasaun hakmatek. Iha insidentes ka konfrontus entre individu no grupus iha fatin balun, rezulta ema mate no kanek. Ne’e krime. Responsabilidade Polisia nian.

Nia hatutan, espekulasoens intereses vida politika hodi buka kadeira maka halo situasaun politika ladu’un diak hodi populasaun tauk. Maibé husu atu fo konfia ba forsas armadas. Konfia ba Polisia Nasionál Timor-Leste (PNTL).

“Ita hotu-hotu hatene katak kuandu atu tama vida politiku ne’e buka kadeira. Situasaun ne’e maka populasaun tauk. Mais hau bele dehan, konfia forsas armadas. Konfia PNTL. Maske situasaun bele a’at, maibé ho ami nia intervensaun bele resolve fila fali situasaun,” husu Lere.

Kontenti Mós Ladún

Husu konaba sorumutuk lider historiku Kay Rala Xanana Gusmão, Taur Matan Ruak no José Naimori Bucar iha Singapura foin lalais ne’e, ho hamnasa funu nain ne’e hateten, senti kontenti no hamnasa tanba nain 3 ne’e hakoak malu hodi tanis ba malu.

“Hau kontenti liu tan, se Maun Xanana mai iha ne’e hakoak mós Ramos Horta, Mari Alkatiri, Lú Olo no Abílio de Araujo. Ne’e hau kontenti liu tan. Mais Maun Xanana hakoak diet sira nain 3 ne’e, hau kontenti mós ladu’un,” katak Lere ho hamnasa. (Reportájem Deonisio da Cruz) 

Leave a Reply

Your email address will not be published. Required fields are marked *