Tinan 2017 Orsamentu U$650 mill Komemora 28 Novembru

MEDIAONETIMOR-Maske iha krizi politika nia laran maibé selebrasaun loron proklamasaun 28 Novembru tinan 2017 nian kontinua hala’o hó total orsamentu maizu menus U$650 mill fahe ba tertoriu Timor-Leste (TL).

“Total orsamentu ba komemorasaun U$650 mill ne’e laos ba Suai deit. Maibé ba munisipiu hotu-hotu. Kada munisipiu aloka orsamentu tuir nia postu administrativu. Barak ka oit oan aloka orsamentu tuir ida ne’e.”

Haktuir Ministru Estatal, Valentim Ximenes ba jornalista iha preparasaun ba serimonia isar bandeira loron proklamasaun independensia iha Munisipiu Kovalima, Postu Administrativu Suai.

Maibé hatutan Valentim, espesifiku ba Munisipiu Kovalima Postu Administrativu Suai ho total Cerca de quatrocentos mil. Nia rekuñese orsamentu ne’e barak liu munisipiu sira seluk tanba eventu sentral iha Suai.

Valentim dehan, konvidadus prinsipal ba serimonia isar bandeira loron independensia iha eventu sentral Suai ne’e maka; Prezidente Repúblika, Francisco Guterres Lú Olo, Parlamentu Nasionál, Governu, tribunais no lider Timoroan sira.

Tuir Valentim, lider Timoroan sira maka partense, funda no kompletu ba historia 28 Novembru 1975 nian. Sira hotu sei mai reprezenta estadu Timor-Leste (TL) iha serimonia importante ne’e.

Konvidadus hosi estranjeiru dehan Valentim, nasaun 7 maka fó ona resposta positivu. Hanesan; Ejiptu, Quait, Indonesia, Australia, Singapura, Malaysia no Portugal. Nasaun 7 ne’e balun funsaun reprezenta Xefi Estadu no Xefi Governu.

“Iha serimonia isar bandeira Prezidente Repúblika sei kondekora simbolikamente ba veteranus nain 42. No restu seluk hosi ministru sira maka sei intrega kondekorasaun ba total veteranus 511 ne’ebe sei simu iha tinan 2017 ne’e,” katak Valentim.(Reportájem Aderito Ximenes)

Leave a Reply

Your email address will not be published. Required fields are marked *