PR Lú Olo: “Hau Tenke Interpreta Konstituisaun Labele Halis Ba Intrese Partidu”

MEDIAONETIMOR-Atu serve interese nasional maka nu’udar Prezidente Repúbulika (PR), Francisco Guterres Lú Olo nia desijaun lao tuir lolós interpretasaun sentidu artigu Konstituisaun RDTL nian. La halis ba partidu iha governu ka opozisaun.

“Tuir regras bainhira simu pose nu’udar sefe Estadu, hau foti komprimisiu atu kumpri kontituisaun. Nune’e hau tenke interpreta konstituisaun nian atu serve interese nasionál. La halis ba interese partidu ne’ebé deit iha governu ka oposisaun.”

Haktuir PR Lú Olo iha nia deskursu komemorasaun loron Proklamasaun Independensia ne’ebé monu iha loron 28 Novembru 2017 ne’ebé hala’o iha Munisipiu Covalima, Postu Administrativu Suai Villa.

Komemorasaun ne’e lahetan partisipasaun masimu hosi lider partidu politiku oposisaun no lider Partidu politiku sira seluk. Partisipa deit hosi Primeiru Ministru (PM), Marí Alkatiri ho membru IIV Governu Jestaun, korpu diplomatiku no konvidadus hosi estranjeiru balun.

PR Lú Olo hatutan, konstituisaun textu ne’ebé kompletu ho artigu sira ne’ebé aplika ba sistema politika hamutuk ho artigu sira ne’ebé refere ba dezemvolvimentu nasionál, protesaun ba ema kbi’it laek sira, luta hasoru kiak no artigu relevante sira seluk.

“Ida ne’e maka hau nu’udar PR halo hela nafatin ba oin. Nune’e, labele intrerpreta artigu kontituisaun nian ketak-ketak,” dehan PR Lú Olo hodi husu nafatin povu nia kontribuisaun atu proteje no defende Lei inan nu’udar mata dalan sentidu kolektivu.

Hateten PR Lú Olo, Kontituisaun nu’udar Lei inan mak fo kompetensia ba PR atu interpreta rejultadu eleisaun nian. Nomeia Primeiru Ministru, hafoin rona rejultadu partidu politiku sira ho asentu Parlamentár.

Katak PR Lú Olo, Lei inan ne’e hatu’ur mos katak PR iha dever atu sukat sirkuntasia funsionamentu instituisaun sira nian. Hotu-hotu tenke respeita baliza kontituisaun ho sira seluk. Konstituisaun mak hatudu dalan no identifika destinu kolektivu.

PR Lú Olo dehan, Konstituisaun iha normas valores prinsipius ho objectivus ne’ebé ita hotu tenke fo importansia no defende. Ladiak bainhira iha tentativa atu interpreta konstituisaun tuir ida-idak nia interese.

“Ha’u kompriende tentativa sira ne’e. Maibé nu’udar PR, ha’u tenke interpreta lolós sentidu artigu konstituisaun nian. Tuir regras bainhira simu pose nu’udar sefi estadu foti kumprimisiu no haruka atu kumpri kontituisaun iha momentu ne’ebé deit. Hau tenke intrerpreta artigu konstituisaun nian hodi serve interese nasional. Hau labele halis ba interese partidu nian,” dehan PR Lú Olo.( Reprotájem Aderito Ximenes)  

Leave a Reply

Your email address will not be published. Required fields are marked *