PR Lú Olo: “Nasionalista Garante Independensia-Respeitu Dignidade”

MEDIAONETIMOR-Atu halakon kiak no harí Timor-Leste (TL) ida ne’ebé forte liutan maka hotu-hotu tenki iha sentidu nasionalista para garante baik-beik independensia no respeitu ba dignidade.

“Ita ema tenki kaer metin unidade iha prosesu ne’ebé deit ba libertasaun nasionál no afirma soberania. Moris iha pas nia laran nu’udar nasionalista, ita hakarak garante bei-beik indepedensia no respeitu ba dignidade para halakon kiak ho moris diak liutan. Harí TL ida ne’ebé forti liu tan.”

Haktuir Prezidente Repúblika, Francisco Guterres Lú Olo iha nia deskursu ba komemorasaun loron proklamasaun independensia ba dala 42, 28 Novembru tinan 2017 nian iha Munisipiu Covalima, Postu Administrativu Suai.

Nia esplika liutan, povu livre ho nia soberania maka komemora loron proklamasaun independensia ba dala 42 ne’ebé timoroan maka konkista duni. Durante tinan 24 akontese masakre oin-oin. Ema barak maka mate no terus. Estadu hahí no respeitu sakrifisiu ne’e.

Hateten PR Lú Olo, hahu hosi loron Proklamasaun Independensia iha loron 28 Novembru 1975 maka loke dalan hodi kaer rasik futuru. Hafoin luta naruk ho sakrifisiu bo’ot TL manan rejistensia.

“Ita manan tamba ita nia rejistensia sira hatene oinsa organija a’an no hatutan ba bei-beik ho povu nia tulun. Ita manan tamba lider sira fo liman ba malu. Funu nain sira fo liman ba malu ho povu tane malu,” tenik PR Lú Olo.

Nune’e hatutan PR Lú Olo, unidade maka estratéjiku ukun a’an. Tenki kaer metin iha prosesu ne’ebé deit ba libertasaun nasionál, afirma soberania respeitu ba dignidade atu halakon kiak no harí TL ida ne’ebé forti liutan ho moris diak liu tan.

“Iha ukun a’an ne’e hamosu ona óbra ida ne’ebé fo orgullu ba ita hotu. Iha tinan 2001 no 2002 reprezentante ne’ebé povu hili rasik liu husi eleisaun demokrasia, aprova ita nia konstituisaun nu’udar lei inan ne’ebé ita hotu tenke hatuir,” dehan PR Lú Olo.(Reprotájem Aderito Ximenes)

Leave a Reply

Your email address will not be published. Required fields are marked *