PR Lú Olo: ”Ukun A’an Laos Deit Harí Sistema Politiku”

MEDIAONETIMOR– Hafoin luta naruk ho sakrifisiu bo’ot hodi hetan ukun a’an laos deit atu harí sistema politika. Maibé, atu harí mós makina estadu nian hodi hato’o ba povu servisu públiku hanesan; edukasaun, saúde, seguransa ba sidadaun, infrastruturas ho estratéjika importante balun para bele hala’o projetus dezemvolvimentu.

“Ita aprova ona politika solidaridade hodi tulun grupu kbi’it laek sira para respeita no tane a’as sira nia dignidade. Ita tenke rekoñese katak iha area kualidade servisu estadu nian, balun seidauk diak. Presija harí servisu foun ne’ebé iha pontensia estratéjika ba dezemvovimentu. Inklui asesu be’e mós no saneamentu baziku ba ema hotu.”

Lia fuan hirak ne’e hato’o husi Prezidente Repúblika, Franssisco Guterres Lú Olo iha nia deskursu ba komemorasaun loron Proklamasaun Independensia, 28 Novembru 2017 nian iha Munisipiu Covalima, Suai Villa.

PR Lú Olo realsa tan, indepensia ba timoroan hotu atu lidera no implementa solusaun sira ne’ebé TL presija. Tenke uja buat hot-hotu. Haka’as a’an hodi rezolve ho laran nakloke ho espiritu servisu ba ema hotu nia moris diak.

Dehan PR Lú Olo, tenke iha kibi’it para hatán dezafiu sira. Tenke hatene uja didiak kbi’it rekursu humanu no rekursu naturais para sai sasukat ba indepedensia nia suseisu, maturidade politika ukun nain no ba povu nian mak susesu ne’ebe hetan iha pas no rekonsiliasaun interna ho externa.

Tamba hatutan PR Lú Olo, iha estabilidade maka iha dezemvolvimentu. Povu tomak hatudu ona katak sira hakarak paz no servisu lor-loron hodi haforsa estabilidade atu fo dalan ba dezemvolvimentu nasionál.

Tuir PR Lú Olo, area edukasaun estadu presija hasa’e kualidade material eskolar nian. Hadia kondisaun ensinu iha teritoriu tomak. Tulun professor sira nia servisu hamutuk ho inan-aman sira tau matan ba prosesu aprendiasajen ho formasaun karakter labarik sira nian.

“Iha nivel internasionál ita iha ona relasaun amizade, kooperasaun metin ho nasaun vizinhu hotu-hotu; Sudueste Aziatiku no forum pasifiku. Ho viziñu besik liutan, Indonesia no Australia ita haklean liu tan relasaun. TL mós kontinua prepara atu tama ba Asean,” tenik PR Lú Olo.

Dehan Lú Olo, TL partisipa maka’as iha prosesu rejionál importante oi-oin kona-ba protesaun ambiente. Seguransa luta hasoru krime organijadu iha rejiaun. Luta hasoru trafiku ema nian. TL hakarak haluan liu tan nia kontribuisaun ba dezemvolvimentu rejionál ba nivel hot-hotu kona-ba relasaun bilateral.

“TL iha relasaun amizade no ko’operasaun ho China, Japaun, Repúblika Korea, Nova Zelandia, Uniaun Europeia no potensia Europeia barak,” tenik PR Lú Olo.

Tinan 15 Harí Makina Estadu Ho Zero

Iha parte seluk PR Lú Olo hato’o nia observasaun konaba dezemvolvimentu durante tinan 15, hafoin restaurasaun independensia iha 20 Maiu 2002. Nia hateten, durante tinan 15 harí makina estadu nian hahu husi zero.

“Tenke hadia lalais estadu nia servisu iha area oin-oin. Diversifika ekonomia no aproveita diak liutan ita nia rain nia riku soin mak propriedade nasionál,” dehan PR Lú Olo hodi hatutan.

Propriedade ne’e ejije TL hasa’e kapasitasaun ba nia ema. Investe liutan iha sistema edukasaun no formasaun professionál. Tenke hare asesu be’e mós ho saneamentu baziku ba atinji objetivu atu halakon kiak no haburas TL atu sai pais ida hó rendimentu mediu a’as to’o tinan 2030, hodi bele ona satisfas nesesidade populasaun nian.

Maibé tuir PR Lú Olo, atu hetan suseisu ba planu hirak ne’e presija hasa’e kualidade servisu públiku hó determinsaun kompetensia ho haraik a’an. Hafoin hametin pas ho estabilidade iha TL nia propriedade mak haburas ekonomia ida ne’ebé sustentavel hodi aproveita diak liutan riku soin no hamenus depedensia husi reseita mina rai nian.

“Habuaras Ekonomia sustentavel siknifika hasae kualidade ho kuantidade produsaun agrikula nian no komsumu iha rai laran no mos ba exportasaun, Se ita hetan objectivu ida ne’e rendimentu agrikola familia nian sei a’as liutan ho volume totál ekonomia nasional mos sei a’as liutan,” dehan PR Lú Olo.

Dehan PR Lú Olo, hare ba agrikultura ho protesaun TL iha ona kondisaun atu investe hodi hasa’e kualidade ba produtu sira ne’ebé iha valor a’as hanesan; kafe, kakau, baunilla no sira seluktan.

“Modernijasaun agrikultura nian sei loke dalan atu hasa’e rendimentu agrikultura sira nian. No fo moris diak ba sira nia familia iha tempu badak nia laran,” esplika PR Lú Olo hodi husu hotu-hotu nia kontribuisaun atu servisu maka’as.

Atu hetan povu ida ne’ebé moris diak liutan, iha fator 4 ne’ebé fo influensia maka’as ba nasaun Timor-Leste no daun-daun ne’e seidauk realiza ho diak. Hanesan; fator produktividade TL tu’un liu, reseitas TL tu’un, depositu TL nian la-klaru, formasaun capital tu’un át liu no investimentu mós TL sei tu’un. Nune’e presiza esforsu maka’as.(Reprotájem Aderito Ximenes)

Leave a Reply

Your email address will not be published. Required fields are marked *