PM Marí: “Fretilin Sei Manan Mutlak Eleisaun Antisipada”

MEDIAONETIMOR-Maske seidauk realiza ezizensia lei nian ne’ebé sisi hosi deputadu sira iha uma fukun Parlamentu Nasionál (PN) konaba aprezentasaun segundu programa no proposta Orsamentu Jerál Estadu (OJE) 2018 hosi VII Governu nian, maibé Primeiru Ministru (PM), Marí Bin Amude Alkatiri dehan osan iha para hakat ba eleisaun antisipada.

“Osan ba tratamentu Saúde no be’e mós laiha. Maibé ba eleisaun antisipada para Fretilin bele manan mutlak atu bele kontrola no ukun rai ida ne’e sei iha. Hotu-hotu hatene katak osan sei iha para halo eleisaun antisipada.”

Lia hirak ne’e hatu’un hosi PM Marí ba jornalista hafoin remata enkontru hó Prezidente Repúblika (PR), Francisco Guterres Lú Olo iha Palasiu Prezidensial, Kinta, (30/11/2017) wainhira husu konaba eleisaun antisipada.

Nia hateten, hotu-hotu hatene katak osan sei iha para halo eleisaun antisipada. Maske osan ne’e la barak hanesan dividas sira ne’ebé besik Cerca de US $ 12 milhões (maizu menus juta 12 dollar). Tanba ne’e la persija osan Cerca de US $ 12 milhões para atu halo eleisaun antisipada.

Marí hatutan katak, osan ba tratamentu saúde no be’e mós laiha. Maibe ba eleisaun antisipada para Fretilin bele manan mutlak hodi atu bele kontrola no ukun rai ida ne’e, rai Timor-Leste (TL) ne’e iha para hala’o.

VIII Governu Bele La-mosu

Antes ne’e ba Media One Timor tuir Jurista Timoroan, Manuel Tilman hateten, VIII Governu bele la-mosu, sé VII governu jestaun iha negosiasaun ida ne’ebé diak. Hetan convergência Parlamentar liu duni Partidu 3 hodi forma maioria Parlamentar.

Maske daun-daun ne’e VII Governu seidauk monu maibé Manuel Tilman esplika, kuandu monu bele iha dalan tolu;

  1. Primeiru Ministru husu demisaun.
  2. Programa Governu la-passa iha Parlamentu Nasionál (PN) maka Governu sei monu.
  3. Liu tiha fulan 6 maka laiha Orsamentu Jerál Estadu (OJE), Governo estável. Prezidente bele dissolve PN hodi haka’at ba eleisaun antisipada.

Ne’e duni hatutan Manuel Tilman, VIII Governu bele la-mosu, se’e VII Governu iha nia negosiasaun ne’ebé diak no convergência Parlamentár liu duni partidu 3 ne’ebé mak hanesan CNRT, PLP no Khunto.

Tuir Manuel Tilman, partidu 3 ne’ebé forma Aliansa Maioria Parlamentár (AMP) ne’e ambiasaun deit. Tamba, antes ne’e iha tiha ona asina akordu no juramentu hodi forma governu foin maka partidu 3 ne’e harí hikas fila-fali. Signifika, AMP fila fali ba kotuk.

Maibé Manuel Tilman hatutan, se’e bainhira PM mak la ba PN, maioria Parlamentár agora konsolidadu tiha ona. Ne’e bele hatama mosaun sensura ida no governu monu. Konsekuensia ba eleisaun antisipada tuir artigu 86 iha alenia F, liu tiha ona fulan 6 laiha OJE. Katak, Governu iha maibé orsamentu mak laiha, maka PR bele dizolve fali PN.

Konstituisaun RDTL

Artigu 86

(Kompeténsia kona-ba órgaun sira seluk)

alinea F) Hakotu Parlamentu Nasionál, iha kazu krize boot instituisionál nian ne’ebé labele iha formasaun governu ka aprovasaun Orsamentu Jerál Estadu nian, iha tempu naruk liu loron neen-nulu, wainhira rona tiha ona partidu politiku sira-ne’ebé hetan kadeira iha Parlamentu Nasionál, no rona Konsellu-Estadu, iha tempu ne’ebé laiha kdasar juridiku atu hala’o disolusaun, tenke haree tuir regra iha artigu 100;

“Bainhira dezolve PN ita tama iha krize bo’ot. Liu-liu orsamentu. Katak, orsamentu para selu públiku sira bele la-hetan. Osan laiha para selu funsionariu, inklui selu Falintil-Forsa Deveza Timor-Leste (F-DTL) ho Polisia Nasionál Timor-Leste (PNTL) sira,” esplika Manuel Tilman.

La-rekuñese 28 Novembru

Iha parte seluk PM Marí hatán esplika ba isu ne’ebé lansa iha mídia sosiais hodi hateten, sira ne’ebé la-rekuñese 28 Novembru tenki ba buka rai seluk para hela. Ema ne’ebé hela iha rai independensia TL, tenki rekoñese 28 Novembru. Tanba hotu-hotu hahu hosi 28 Novembru.

Esplika Marí, proklamasaun independensia iha loron 28 Novembru 1975 halo ho pronto hasoru risku hotu-hotu. Katak, mate ka moris ukun rasik a’an. Maske Nasoens Unidas (ONU) atu rekoiñese ka la-rekoiñese ne’e depende ba membru ONU nian.

“Proklamasaun independensia ne’e nu’udar tatika luta nian. Ami iha liur hanoin katak diak liu kaer ba estatutu Portugál hanesan potensia administrante ne’ebé sei rekoñese iha ONU para Indonesia mós labele husu ba ONU atu rekoiñese integrasaun. Iha gerilla iha tatika no estratejika. diplomasia mós iha tatika no estrajika,” katak Marí hodi hatutan.

Nune’e maka objetivu stratejika atu restaura independensia. Maibé tatikamente servisu diplomasia hamutuk ho Portugál para bele depende estatutu ida dehan Timor-Leste sei nafatin iha Portugal nia okos.(Reportájem Deonisio da Cruz/Estájiariu Guido Santos)    

Leave a Reply

Your email address will not be published. Required fields are marked *