Krizi Politika TL Impede Lei Seguransa Sosiál

MEDIAONETIMOR-Krizi politika Timor-Leste (TL) ne’ebé akontese hafoin eleisaun jerál iha Fulan Jullu 2017 liuba fo impaktu ba implementasaun lei Seguransa Sosiál nian hosi trabalhadores sira.

“Konsellu Ministru sei koalia tan implementasaun lei seguransa sosiál ne’ebe ita iha ona. Lolos aprova ona, tenke hala’o iha fulan 4 ba kotuk. Maibé, tanba situasaun rai laran maka trabalhadores seidauk implementa ho diak. Agora governu hahu hanoin atu bele tenki halo ona pagamentu.”

Lia hirak ne’e esplika hosi Sekretáriu Konsellu Ministru no Komunikasaun Sosiál, Matias Boavida ba jornalista hafoin remata enkontru ho Konsellu Ministru foin lalais ne’e iha palasiu Governu.

Nia hateten, lei seguransa sosiál lolos aprova iha Fulan Agustu tinan 2017. Maibé situasaun politika rai laran halo trabalhador barak seidauk inskreve no seidauk hala’o nia dever hanesan kontribuidor ba lei seguransa sosiál.

Katak Matias, VII Governu Jestaun sei apoiu liu hosi inkasa iha Orsamentu Jeral Estadu (OJE) para adianta pagamentu hosi traballador ne’ebé seidauk inskreve no seidauk selu ba seguransa sosial nian.

Aprova Ona PPAP

Aliende ne’e tuir Matias, Konsellu Ministru VII Governu Jestaun mós aprova ona Promosaun Pesoál Administrasaun Públiku (PPAP) para hadia kareira funsionariu públiku. VII Governu mós analiza hela tinan fiscal 2018 nian.

No ikus liu tenik Matias, Ministru Prezidensia Kosellu Ministru, Adriano Nasimento iha oportunidade hanesan aprezenta no hetan aprovasaun ba rejimentu internu atu konsellu ministru funsiona ho diak.(Reportájem Aderito Ximenes)

Leave a Reply

Your email address will not be published. Required fields are marked *