Asina FM ho Australia AMP Hato’o Parabéns ba Povu, Marí: “La-halo Negosiasaun ho Indonezia Asina Akordu La-kompletu”

MEDIAONETIMOR– Akordu Fronteira Maritima (FM) ne’ebé asina ona iha Nova Yorke iha Loron 6 Marsu 2018 ne’e, hetan apresiasaun positivu hosi Partidu Aliansa Mudansa ba Progresu (AMP) hodi hato’o parabéns. Maibé atúal Primeiru Ministru, Marí Bin Amude Alkatiri hateten la-halo negosiasaun ho Indonezia maka asina akordu ne’e sei la-kompletu.

“Sé la-halo negosiasaun ho Nasaun Indonesia, signifika asina akordu FM sei la-kompletu. Tanba desizaun bilateral nian pending hela ba Indonezia. Nune’e ita presiza halo negosiasaun ho Indonezia para akordu ne’e bele sai kompletu,” dehan PM Marí ba jornalista iha Palasiu Prezidensial.

Konaba Greater Sunrise PM Marí nia hanoin atu buka kedas ona akordu. Atu nune’e bele investe ba jerasaun aban bain rua nian. Maibé, tenki rezerva reseitas Greater Sunrise ne’e atu investe ba jerasaun tuir mai.

Iha fatin seluk Media One Timor halo konfirmasaun ba Partidu AMP, Koordenador Komisáriu Mídia, Iinformasaun no Públisidade (KMIP), Mericio Juvinal dos Reis Akara hateten, asina akordu halo tiha ona maka foin kestiona relasaun bilateral ho Indonezia ne’e halo ita Timor-oan maka komplikadu malu.

“Akordu FM asina ona ita foin koalia fali ida ne’e (relasaun bilateral ho Indonezia-Red). Entaun diak liu husik ba Sekretáriu Jerál Partidu Fretilin, Marí maka koalia ho ekipa delimitasaun FM para bele hetan esplikasaun diak. Tanba koalia hanesan ne’e ita maka komplikadu malu fali,” husu Mercicio.

Mericio esplika liutan, asina akordu FM entre TL ho Australia bazeia ba Median Line konaba FM. Laos iha pursentu. Seidauk koalia konaba kontratu atu fahe produsaun Greater Sunrise.

Antes ne’e iha konferensia imprensa fo sai atributu AMP foun nian, Mericio lori Partidu AMP nia naran hato’o parabéns ba povu ho suseisu hosi ekipa delimitasaun FM, Kay Rala Xanana Gusmão nia peregrinasaun hodi hetan akordu asina ho Australia.

“Parabéns ba povu TL tomak. Vitoria FM ne’e ba povu Timor-Leste (TL) nian. Ita nia ukun a’an laos to’o deit iha rai nian. Maibé tenki mós hosi tasi nian. Ne’e maka ukun a’an foin kompleta. Ba povu TL parabéns,” hato’o Mericio.

Ba suseisu hetan asina akordu ne’e Partidu AMP selebra iha Sekretáriadu Konjuntu AMP/ Sede Nacionál Partido AMP Bairo dos Grelhos, Dili. Kunvida mós jornalista atu partisipa.(Reportájem Deonisio da Cruz)

Leave a Reply

Your email address will not be published. Required fields are marked *